Gürcüstan, Tbilisi, 17 fevral / Trend , müxbir N.Kirtsxaliya/ Gürcüstan İqtisadi İnkişaf Nazirliyində iki yeni struktura rəhbərlər təyin olunub. Trend -a nazirliyin mətbuat xidmətindən verilən məlumata görə, İxraca Yardım Departamnetinə Georgi Tkeşelaşvili rəhbərlik edəcək.
Yeni təyinata qədər bir il ərzində Tkeşelaşvili "Prima sement" MMC-nin kommersiya direktoru olub. İxtisasca iqtisadçı olan (Gürcüstan Kənd Təsərrüfatı İnstitutunun iqtisadiyyatın təşkili fakültəsini bitirib) Tkeşelaşvili, müxtəlif zamanlarda Gürcüstan iqtisadiyyat və aqrar-sənaye kompleksinin idarə olunması Eİİ-da, Gürcüstan Milli Bankında, "Aqroprombank" SC-də işləyib, 2000-2004-cü illərdə Gürcüstan kənd təsərrüfatı nazirinin müavini, 2004-2005-ci illərdə Gürcüstan kənd təsərrüfatı nazirinin birinci müavini vəzifələrində çalışıb.
İxraca Yardım Departamenti İqtisadi İnkişaf Nazirliyində 2009-cu il yanvarın 16-da yaradılıb. Onun əsas məqsədləri - sahibkarların məlumatlandırılması və onlara Gürcüstan istehsallı məhsulların ixracı məqsədilə məsləhətlər verilməsi, ixraca yönəlik müəssisələrə xarici sərmayələrin cəlb olunması, ölkə xaricində Gürcüstan mallarının sərgi-yarmarkalarının təşkilidir.
Nazirliyin nəzdində daha bir qurumun - Müqavilə Öhdəliklərinin Monitorinqi Departamentinin rəhbəri David Çelidze təyin olunub. İxtisasca tarixçi-arxeoloq olan (Tbilisi Dövlət Universitetini bitirib) Çelidze Gürcüstan arxeoloji tədqiqatlar mərkəzində elmi işçi, Nazirlər Kabinetinin parlamentlə münasibətlər məsələlərində məsləhətçi, Dövlət dəftərxanasında təşkilati məsələlər üzrə məsləhətçi, Dövlət Sərhədinin Mühafizəsi Departamentinin rəhbər müavini, Müdafiə Nazirliyinin Siyasi İnfrastruktur və Logistika Departamentinin rəisi vəzifələrində çalışıb.
Müqavilə Öhdəliklərinin Monitorinqi Departamenti hökumətin 2009-cu il 16 yanvar tarixli qərarı ilə yaradılıb və nazirlikdə mövcud olmuş müqavilə öhdəliklərinin monitorinqi idarəsinin bazasında yaradılıb.
Məqalə müəllifi ilə əlaqə ünvanı: [email protected]
