Azərbaycan, Bakı, 13 avqust / Trend , müxbir İ.Xəlilova /
"Beynəlxalq Valyuta Fondu (BVF) fondun Azərbaycandakı daimi nümayəndəliyinin başçısının geri çağırılması və ümumilikdə ölkədəki ofisin ştatının azaldılması barədə qərar qəbul edib", - cümə axşamı Azərbaycan Mərkəzi Bankından (AMB) bildirilib.
"BVF-in Bakı ofisi hələ ki, yeri müəyyənləşdirilməyən Mərkəzi Asiya və Qafqaz üzrə nümayəndəlikdən idarə ediləcək, - AMB-dən deyilib. - Ancaq Azərbaycandakı daimi nümayəndəliyin işçilərinin ixtisara salınması prosesi mərhələli şəkildə aparılacaq".
"Bu proses sentyabr-oktyabrda başlayacaq və nümayəndəliyin əməkdaşlarının müqavilə öhdəliklərinin müddətindən asılı olaraq 2010-cu ilin mart-aprel aylarında başa çatacaq", - mənbə hesab edir. Hazırkı ştat səkkiz nəfərdən ibarətdir.
BVF-in bu qərarı Mərkəzi Asiya və Yaxın Şərq üzrə Departamentin rəhbəri Devid Ouenin Bakıya bu yaxınlarda etdiyi səfər zamanı elan edilib. O, ölkənin Baş naziri, maliyyə naziri və Mərkəzi Bankın rəhbəri ilə görüşlər keçirib.
"BVF-in Azərbaycan nümayəndəliyinin xərclərinin azaldılması onunla əsaslandırılır ki, artıq bu ölkənin fondun resurslarına ehtiyacı yoxdur. Çünki Azərbaycanın ödəmə balansında yetərincə böyük müsbət saldo var, - AMB-dən bildirilib. - Buna görə də qənaət edilmiş vəsaitləri fond hazırda BVF-dən böyük həcmdə kredit alan ölkələrə yönəltmək fikrindədir".
BVF-in Azərbaycan nümayəndəliyinin hazırkı rəhbəri Koba Qvenitadze öz vəzifəsinin icrasına 2009-cu il yanvarın 14-də başlayıb.
BVF-in Azərbaycandakı daimi nümayəndəliyi 1993-cü ildən fəaliyyət göstərir, ancaq hökumətlə əməkdaşlıq bundan bir il əvvəl başlayıb. Ölkənin kreditləşdirilməsinə beynəlxalq təşkilat 1995-ci ildən başlayıb. Bu günə qədər BVF Azərbaycana altı proqram çərçivəsində kredit ayırıb. 2005-ci ildən başlayaraq BVF-lə əməkdaşlıq məsləhətləşmələr səviyyəsində davam etdirlir. Çünki Azərbaycan hökuməti fondun kreditlərinin alınmasından imtina edib.
Hazırda qlobal maliyyə böhranına baxmayaraq, ölkənin fonddan kredit almasının bərpasına səbəb yoxdur.
AMB-də BVF-lə gələcəkdə də texniki yardım proqramlarının davam etdirilməsinin mümkünlüyünü istisna etmirlər, ancaq onların həcmi son zamanlar xeyli azalıb. Texniki əməkdaşlığın davam etdirilməsi səbəbindən fond, "BVF-in yaradılması haqqında" razılaşmanın IV maddəsinin orta və uzunmüddətli perspektivlərinin illik qiymətləndirilməsini aparmaq fikrindədir.
Azərbaycan 2013-cü ilə qədər fonddan aldığı kreditlərin ödənilməsini davam etdirəcək. 2009-cu ildə BVF-ə ödəmələr SDR 10,29 milyon (əsas borc üzrə SDR 10,05 milyon və faizlər üzrə SDR 0,24 milyon) təşkil edəcək. 2010-cu ildə bu rəqəm ümumi SDR 9,83 milyon (o cümlədən müvafiq olaraq SDR 9,66 milyon və SDR 0,18 milyon), 2011-ci ildə - SDR 11,06 milyon (SDR 10,94 milyon və SDR 0,12 milyon), 2012-ci ildə - SDR 8,6 milyon (SDR 8,53 milyon və SDR 0,07 milyon), 2013-cü ildə isə - SDR 6,47 milyon (SDR 6,44 milyon və SDR 0,03 milyon) olacaq.
Fondda ölkədən idarəçi qismində maliyyə naziri Samir Şərifov çıxış edir.
Məqalə müəllifi ilə əlaqə ünvanı: [email protected]
