Azərbaycan, Bakı, 25 sentyabr / Trend , müxbir N.İsmayılova /
Azərbaycan Mərkəzi Bankı (AMB) bankları filial şəbəkələrinin genişləndirilməsi zamanı konservativ yanaşmaya çağırır. Bu barədə Mərkəzi Bankın kredit təşkilatlarının fəaliyyətinə nəzarət departamentinin direktoru Rəşad Orucov cümə günü deyib.
"Azərbaycan bankları yüksək sürətlə genişləndikləri üçün bütün filiallar üzrə maliyyə əməliyyatlarını izləmək çətinləşib. İndi biz bankları filial şəbəkələrinin genişləndirilməsi məsələsində konservativ yanaşmaya çağırırıq", - Orucov deyib.
Onun sözlərinə görə, AMB Azərbaycan banklarının tədris mərkəzləri ilə birgə bank filiallarının idarə edilməsinin sertifikatlaşdırılması proqramını tədris edəcəklər.
"İlkin mərhələdə filial şəbəkəsi xeyli geniş olan iri banklar əhatə ediləcək və bu bank filiallarının menecerləri ilk növbədə sertifikatlaşdırma prosesini keçməlidirlər", -Orucov deyib.
Onun sözlərinə görə, kurslar sentyabrın sonunda başlayacaq. Proqram il yarım müddətinə hesablanıb.
"Hazırda ölkədə 560 bank filialı fəaliyyət göstərir və bunların hamısı sertifikatlaşdırma prosesinə cəlb ediliblər, kurslar yeni menecerlər üçün də məcburi olacaq", - o deyib.
AMB-nin bank filiallarına nəzarəti gücləndirməsində əsas məqsəd onların maliyyə intizamının yüksəldilməsidir. Filiallar xüsusi balansa sahib deyillər və online-rejimdə gündəlik əməliyyat göstəriciləri bankın baş ofisində təqdim edilir. Burada ayrıca mühasibatçı ştatı tələb edilmir. Bütün maliyyə əməliyyatlarına görə filialın administratoru məsuliyyət daşıyır. Bununla əlaqədar olaraq Mərkəzi Bank ölkənin bank sisteminin filial rəhbərlirinin peşəkarlığından əmin olmaq üçün onların attestasiyasını aparmağı vacib hesab edir.
Keçən ilin yekununa görə, filialların açılması üzrə əsas mərkəz 332 bank filiallarının cəmləşdiyi Abşeron iqtisadi rayonu, 76 filialla Aran iqtisadi rayonu, 57 filialla Gəncə-Qazax rayonları olub. Dağlıq Çirvan və Naxçıvan rayonlarında 10 filial üzrə az sayda bank fəaliyyət göstərir.
Məqalə müəllifi ilə əlaqə ünvanı: [email protected]
