Azərbaycan, Bakı, 03 oktyabr / Trend , müxbir Ü.İsmayılova/
Azərbaycanın Fövqəladə Hallar Nazirliyinin Dövlət Taxıl Fondu ölkədə istehsal olunan yüksək keyfiyyətli taxılın qəbulu üzrə elanın müddətini bir ay daha artırdı. Bu barədə şənbə günü Azərbaycanın Kənd Təsərrüfatı Nazirliyindən bildirilib.
"Müddətin artırılmasının səbəbi qeyri-stabil hava şəraiti və güclü yağışlardır", - nazirlikdən bildirilib.
Mənbənin sözlərinə əsasən, yerli fermerlərdən taxıl qəbulunun müddəti oktyabrın 30-dək artırılıb.
Əvvəlcə FHN avqustun 5-dən sentyabrın 30-dək fermerlərdən Dəvəçi-Dəyirman, Karat-Holdinq, FATOGLU, N.Quliyev adına Bakı-Taxıl, Araz ASC, Aveta, Tovuz-Baltiya LTD və Neon vasitəsilə taxıl qəbulu barədə elan edib. Taxıl bir ton üçün 180 manata qəbul olunur.
Azərbaycan Prezidenti İlham Əliyevin 2008-ci ildə imzalanan fərmanı ilə Dövlət Taxıl Fondu FHN-in sərəncamına verilib və bununla əlaqədar olaraq bütün respublika üzrə dövlətin taxıl və un ehtiyatlarının tənzimlənməsi səlahiyyətləri Azərbaycanın Kənd Təsərrüfatı Nazirliyindən Fövqəladə Hallar Nazirliyinə verilib.
Nazirlər Kabinetinin qərarına əsasən, fond respublikanın 270 min ton taxıl təşkil edən iki aylıq tələbatını ödəyə biləcək ehtiyatı saxlamalıdır.
Oktyabrın 03-nə olan rəsmi məzənnə 0,8035 AZN/USD təşkil edir.
Məqalə müəllifi ilə əlaqə ünvanı: [email protected]
