Azərbaycan, Bakı, 05 oktyabr / Trend , müxbir I.Xəlilova/
Ölkə hökumətinin makroiqtisadi layihəsinin proqnozlarına görə, 2010-cu ildə Azərbaycanda ümumdaxili məhsul (ÜDM) istehsalının 6.8 faiz artım tempi ilə 31.8 milyard manata çatacağı gözlənilir. Bu halda adambaşına düşən ÜDM-in həcmi 4511 dollar olacaq.
2010-cu ildə neft sektorunda ÜDM-in artım həcminin 4.9 faiz, qeyri-neft sektorunda isə 8.3 faiz olacağı gözlənilir. Hökumət 2009-cu ildə infilyasiyanın 3 faiz olacağını proqnozlaşdırır.
Neft sektorunda məhsul istehsalı həcminin 2.4 faiz, kənd təsərrüfatında 4 faiz, nəqliyyatda 9.3 faiz, topdansatış və pərakəndə ticarətdə 7.1 faiz təşkil edəcəyi gözlənilir. Ümumilikdə, sənaye artımının həcmi 7.8 faiz proqnozlaşdırılır.
Gələcəkdə əhalinin sosial yaşayış səviyyəsinin daha da yaxşılaşdırılması üçün Azərbaycan hökuməti orta aylıq əmək haqları və təqaüdlərin artırılmasını nəzəzrdə tutub. 2010-cu ildə əhalinin gəliri 10 faiz - 24.9 milyard manat, orta aylıq əmək haqqı isə 16.9 faiz - 365.6 manat təşkil edəcək.
Gələn il ölkə iqtisadiyyatına 10.5 milyard manat həcmində kapital qoyuluşu gözlənilir ki, bu da 2009-cu illə müqayisədə 4 faiz çox olacaq. Bunun da 80.9 faiz (8.5 milyard manat) daxili investisiyalar hesabınadır.
Hökumətin proqnozlarına əsasən, 2009-cu ildə ÜDM-in həcmi 10 faiz təşkil edəcək. Heft sektorunda ÜDM-in həcminin 5-7 faiz olacağı gözlənilir. İnfilyasiyanın isə 5 faiz olacağı proqnozlaşdırılır.
2008-ci ilin sonunda verilən makroiqtisadi proqnozlara əsasən, 2009-cu ildə Azərbaycan hökuməti ÜDM-in 18.9 faiz, 2010-cu ildə 6.6 faiz, 2011 -ci ildə 4.5 faiz, 2012-ci ildə 2.4 faiz olacağını proqnozlaşdırmışdı. Bu halda adambaşına düşən ÜDM-in həcmi 2009-cu ildə 6300.8 dollar, 2010-cu ildə 6399.9 dollar, 2011-ci ildə 6859.6 dollar, 2012-ci ildə isə 7142.9 dollar proqnozlaşdırılmışdı.
Yanvar-avqust ayları ərzində keçən ilin analoji dövrü ilə müqayisədə Azərbaycanda ÜDM-in həcmi 5 faiz artaraq 20628 milyon manat təşkil edib. Adambaşına düşən ÜDM-in həcmi 2341.3 manat (2912.1 dollar) təşkil edərərk 3.7 faiz artıb.
Məqalənin müəllifi ilə əlaqə üçün: [email protected]
