Azərbaycan, Bakı, 06 oktyabr / Trend , müxbir Ü.İsmayılova/
Azərbaycanın yerli istehlak bazarında toyuq yumurtasının qiymətinin 0,10-0,11 manatadək artmasına baxmayaraq, artıq yarım ildir ki, onun maya dəyəri 0,06 manat təşkil edir. Bu barədə çərşənbə axşamı "İmişli quşçuluq" şirkətinin nümayəndəsi məlumat verib.
"Toyuq yumurtasının maya dəyəri artmayıb, əksinə, dünya maliyyə böhranının təsiri ilə quş yemlərinin qiymətində azalma olub", - mənbədən belə deyilib.
Onun sözlərinə görə, "İmişli quşçuluq" şirkəti quş yemini əsasən Qazaxıstandan alır. Hələlik ixracla bağlı heç bir problem yaşanmayıb.
"Uzun zaman ərzində yem ehtiyatı saxlamayan müəssisələr toyuq yumurtasının qiymətini artırırlar. Digərləri isə hər ay qiymətləri tənzimləyirlər, çünki quşçuluq məhsullarının maya dəyərinin 70 faizi yemin qiymətindən asılıdır", - mənbədən bildirilib.
Oktyabrın 06-na olan rəsmi məzənnə 0,8033 AZN/USD təşkil edir.
Məqalə müəllifi ilə əlaqə ünvanı: [email protected]
