Azərbaycan, Bakı, 18 mart / Trend , müxbir N.İsmayılova/
2010-cu il yanvar-fevral aylarının yekunlarına görə, Azərbaycanda orta aylıq əməkhaqqı 298,2 manat təşkil edib. Bu göstərici ötən ilin müvafiq dövrü ilə müqayisədə 2,1 faiz çoxdur. Bu barədə Dövlət Statistika Komitəsindən bildirilib.
Ən yüksək əməkhaqqı hasilat sənayesində, maliyyə fəaliyyəti sahəsində, istehlakçı və icarə sahəsində, həmçinin inşaat sektorunda, informasiya və telekommunikasiya sahəsində qeydə alınıb.
Müəssisə və təşkilat işçiləri 10 milyon manatlıq sosial yardım alıblar. Bunlar əsasən hasilat sənayesi işçiləri, elektrik, qaz və su istehsalı və paylanması müəssisələri işçiləri, emal sənayesi işçiləri, rabitə və nəqliyyat sahəsində çalışan işçilərdir.
Yanvar-fevral aylarında adambaşına düşən nominal gəlir 360,2 manat təşkil edib. Bu göstərici ötən ilin müvafiq dövrünün göstəricisini 3,1 faiz ötüb. Adambaşına düşən real pul gəlirləri isə 3,5 faiz artaraq 320,4 manat təşkil edib.
İki ayın yekununa görə, Azərbaycanın nominal pul gəlirləri 3201 milyon manat olub ki, bu göstərici də ötən ilin müvafiq dövrü ilə müqayisədə 4,38 faiz çoxdur. Əhalinin real pul gəlirləri bu dövr ərzində 3,5 faizlik artımla 2846,9 milyon manata çatıb.
Hesabat dövrü ərzində əhali şəxsi gəlirlərindən 79,4 faizini malların əldə edilməsinə, 11,1 faizini sosial sığortaya, vergilərin və üzvlük haqlarının ödənilməsinə, 7,7 faizini isə kapitalın yığılmasına və artırılmasına yönəldib.
Martın 18-nə olan cari məzənnə 0,8033 AZN/USD təşkil edir.
