Azərbaycan, Bakı, 18 iyun /Trend, müxbir N.İsmayılova/
Azərbaycan Xarici İşlər Nazirliyi USAID ilə ticarət və investisiyaya dəstək üzrə proqram çərçivəsində əməkdaşlığı faydalı hesab edir, - cümə günü xarici işlər nazirinin müavini Mahmud Məmmədquliyev deyib.
"Proqram bizim üçün faydalıdır, çünki onun əsas elementi Azərbaycan qanunvericiliyinin ÜTT razılaşmasına uyğunlaşdırılmasıdır. USAID ÜTT razılaşmasını bilərək, layihələrimizi nəzərdən keçirir və düzəlişlər edir. Odur ki, ölkədə qəbul edilən bəzi qanun və normativ aktlar ÜTT razılaşmasına əsasən qəbul edilib", - Məmmədquliyev qeyd edib.
Onun sözlərinə görə, USAID-in dəstəyi üzv ölkələrdən alınan spesifik sənədlərin tərcüməsini və digər texniki yardımı nəzərdə tutur.
"Proqramın uzadılması məsələsi müzakirə ediləcək. XİN-in mövqeyi - layihənin həyata keçirilməsinin davam etdirilməsindən ibarətdir. Belə ki, USAID-lə əməkdaşlıq kifayət qədər faydalıdır", - o bildirib.
USAID-in ticarət və investisiyaya dəstək üzrə proqramı iki komponentdən ibarətdir: Azərbaycanın ÜTT-yə daxil olmasının dəstəklənməsi, ölkədə ticarət və investisiya mühitinin yaxşılaşdırılması. Layihənin həyata keçirilməsi cari ilin payızında başa çatır.
