Azərbaycan, Bakı, 23 dekabr /Trend, müxbir E.İsmayılov/
Dekabrın ikinci rübündə kifayət qədər isti hava və yağışların yağmaması Azərbaycanın aqrar sektorunda səpilən bitkilər üçün əlverişsizdir. Bu barədə cümə axşamı jurnalistlərə kənd təsərrüfatı naziri İsmət Abasov deyib.
Nazirin sözlərinə görə, bu gün Azərbaycanda qar altında olan Avropadan fərqli olaraq, artıq uzun müddətdir ki yağış yağmır, havanın temperaturu isə normadan yuxarıdır. "Düzdür, noyabrda və dekabrın əvvəlində hava şəraiti əkin prosesinə müsbət təsir göstərib, nəticədə əkin ərazilərinin əlavə olaraq daha 50 min hektar artırılması mümkün olub", - nazir bildirib.
Abasovun qeyd etdiyi kimi, yağışların yağmaması səpinlərə mənfi təsir göstərir.
Nazirin sözlərinə görə, isti hava əkin ziyanvericilərinin artmasına da şərait yaradır.
Buna baxmayaraq, Kənd Təsərrüfatı Nazirliyi gözləyir ki, yaxın vaxtlarda yağış yağacaq və əkilən ərazilərdən lazımi sayda məhsulun əldə edilməsi üçün bütün zəruri tədbirlər görüləcək.
2010-cu ilin yanvar-noyabrında ötən ilin analoji dövrü ilə müqayisədə Azərbaycanda bitkiçilik sahəsində istehsalın həcmi 9 faiz azalıb. Yanvar-noyabrda kənd təsərrüfatı məhsullarının ümumi istehsalı ümumilikdə illik hesablamada 2,7 faiz azalıb.
Dekabrın 1-nə olan məlumata görə, bitkiçilik məhsullarının əksəriyyətinin yığımı başa çatıb. Bu dövr ərzində ümumilikdə 2000,3 ton taxıl və paxla bitkiləri yığılıb. Bunun 1864,2 min tonu və ya 93,2 faizi payız və yaz taxıl və paxla bitkiləri, 136,1 min ton və ya 6,8 faiz qarğıdalı təşkil edir.
Bu dövr ərzində taxıl və paxla bitkiləri ilə yanaşı, 433,2 min ton bostan bitkiləri, 1178,9 min ton tərəvəz də yığılıb. Bunların artımı müvafiq olaraq 5,7 faiz və 1,5 faiz təşkil edib. Bostan bitkilərinin məhsuldarlığı beş faiz artaraq 137 sentnerə, tərəvəzlər isə iki sentner artaraq 147 sentner olub.
Kartof istehsalı 2,6 faiz azalaraq 953,7 min tona çatıb, bir hektarda kartofun orta məhsuldarlığı 3 faiz azalaraq 145 sentnerə çatıb.
