Azərbaycan, Bakı, 7 yanvar /Trend, müxbir E.İsmayılov/
Gəncə Avtomobil Zavodu və "Aqrolizinq" dövlət lizinq şirkəti 500 ədəd traktor və bir o qədər də asma avadanlığın tədarükünə dair müqavilə imzalayıblar. Bu barədə cümə günü Gəncə zavodunun rəhbəri Xanlar Fətiyev deyib.
Fətiyevin sözlərinə görə, ötən il tərəflər arasında analoji sayda traktor və asma avadanlığın tədarükünə dair müqavilə imzalanıb.
Minsk avtomobil və traktor zavodlarının yük avtomobilləri və traktorlarının bütün hissələrinin yığılmasına və satışına dair saziş 2006-cı il noyabrın sonunda Minskdə imzalanıb. Gəncə zavodu ildə Azərbaycanda 1000-ə qədər yük maşını, 2000 ədəd traktor yığmaq iqtidarındadır. İndi zavodda "Belarus" traktorları yığılır.
Ötən ilin sonunda Azərbaycan Nazirlər Kabineti "Aqrolizinq" dövlət lizinq şirkətinin xətti ilə kənd təsərrüfatı texnikası və texnoloji avadanlığın lizinqə verilməsi şərtlərinə dəyişikliklər edib. Yeni şərtlərə əsasən, "Aqrolizinq" Açıq Səhmdar Cəmiyyətinə məxsus kənd təsərrüfatı texnikasını və texnoloji avadanlıqları lizinqə alan hüquqi və fiziki şəxslər onun dəyərinin 10 faizini ilkin ödəniş kimi ödəməlidirlər, qalan hissəsini isə bir ildən sonra 9 il ərzində, ilkin ödənişi etdikdən bir il sonra ödənişləri etməyə başlamalıdırlar.
Əvvəllər avadanlığın dəyəri 40 min manatı ötəndə ilkin ödəniş 10 faiz, avadanlığın dəyəri 40 min manata qədər olanda isə 20 faizlik ilkin ödəniş edilirdi.
"Aqrolizinq" ASC 2004-cü ilin oktyabrında təsis edilib və ölkənin Kənd Təsərrüfatı Nazirliyinin strukturuna daxildir. Təşkilatın ölkənin 55 rayonunda xidmət məntəqələri var.
2011-ci ildə "Aqrolizinq" üçün 35 milyon manat ayrılacaq. Bu vəsaitlərin 12 milyon manatının traktor və kənd təsərrüfatı texnikasının alınmasına yönəldilməsi planlaşdırılır.