Azərbaycan, Bakı, 29 yanvar /Trend, müxbir А.Axundov/
2010-cu ildə Türkiyədən Azərbaycana ixrac 2009-cu ilin göstəricisinə nisbətdə 10,8 faiz artaraq 1,551 milyard dollar təşkil edib. Bu barədə cümə günü Türkiyə Statistika İnstitutu xəbər verib. 2009-cu ildə Türkiyə Azərbaycana 1,4 milyard dollar məbləğində neft ixrac edib.
Türkiyənin ümumi ixracında türk mallarının Azərbaycana ixrac payı il ərzində dəyişilməyib və 2010-cu ildə də 1,4 faiz təşkil edib.
2010-cu ilin yekunlarına görə, Türkiyənin ümumi ixracı 113,93 milyard dollar təşkil edib. Bu göstərici 2009-cu ildə 102,143 milyon dollar olub.
2010-cu ilin dekabrında Türkiyənin Azərbaycana ixracı 163,910 milyon dollar təşkil edib ki, bu da 2009-cu ilin dekabrındakı 133,154 milyon dollar göstəricidən 23,1 faiz çoxdur.
Dekabrda Türkiyənin ümumi ixracı 11,872 milyard dollar təşkil edib. Azərbaycana ixrac payı 2010-cu ilin dekabrında 1,4 faiz təşkil edib. Bu göstərici 2009-cu ilin analoji dövründə 1,3 faiz olub.
Türkiyə İxracatçılar Şurasının məlumatlarına əsasən, 2010-cu ildə Türkiyə Azərbaycana 345,784 milyon dollar məbləğində kimyəvi preparatlar, avadanlıqlar - 181,39 milyon dollar, elektrik enerjisi -181,165 milyon dollar, ağac- 166,569 milyon dollar, dəmir -140,462 milyon dollar, polad - 114,557 milyon dollar ixrac edib.