...

2011-ci ildə Azərbaycanda əhalinin sosial müdafiəsi üzrə dövlət proqramların maliyyələşdirilməsi üçün 22 milyon manata yaxın vəsait tələb olunur

Biznes və iqtisadiyyat xəbərləri Materials 22 Fevral 2011 15:29 (UTC +04:00)

Azərbaycan, Bakı, 22 fevral /Trend, müxbir Ü.İsmayılova/

Azərbaycan Nazirlər Kabineti "2011-ci ildə əlillərin və sağlamlıq imkanları məhdud uşaqların sosial müdafiəsi ilə bağlı tədbirlərin maliyyələşdirilməsinin Dövlət Proqramı"nı və "2011-ci ildə iş axtaranların və işsiz vətəndaşların sosial müdafiəsi ilə bağlı tədbirlərin maliyyələşdirilməsinin Dövlət Proqramı"nı təsdiqləyib.

NK-nın qərarı ilə hər iki dövlət proqramı 2011-ci il yanvarın birindən qüvvəyə minir.

Hökumətin proqnozlarına əsasən, 2011-ci ildə respublikanın əmək bazarında 520 min nəfərin iştirak edəcəyi, onlardan 64,5 min nəfərinin məşğulluq xidməti orqanlarına müraciət edəcəyi gözlənilir.

Məşğulluq xidməti orqanlarına müraciət edəcək vətəndaşlardan 32 min nəfərin münasib işlə təmin olunması, 4,7 min nəfərə işsiz statusu verilməsi və işsizliyə görə müavinət ödənilməsi, 4 min nəfərin peşə hazırlığı, yenidən hazırlıq və ixtisasartırma kurslarına, 4 min nəfərin haqqı ödənilən ictimai işlərə cəlb edilməsi, 48 min nəfərin isə iş axtaran kimi qeydiyyata götürülməsi proqnozlaşdırılır.

Əlillərin və sağlamlıq imkanları məhdud uşaqların sosial müdafiəsi ilə bağlı tədbirlərin maliyyələşdirilməsinə 15,827 milyon manat,onların sağlamlığının mühafizəsi və tibbi bərpasına 14,113 milyon manat, əlillik problemi ilə bağlı informasiya təminatının, yaradıcılıq və asudə vaxtlarının, idman və bədən tərbiyəsi üzrə tədbirlərin təşkilinə 1,315 milyon manat, maddi və texniki yardımın təşkilinə 399,144 min manat ayrılması nəzərdə tutulub.

İş axtaranların və işsiz vətəndaşların sosial müdafiəsi ilə bağlı 6,018 milyon manat , işsizlik müavinətinin ödənilməsinə 4,35 milyon manat, peşə hazırlığı, yenidənhazırlıq və ixtisasartırma kurslarının təşkilinə 1,064 milyon manat, haqqı ödənilən ictimai işlərin təşkilinə 214,24 min manat, işsizlər üçün yeni məsləhət xidmətlərinin təşkili, əmək birjalarının fəaliyyətlərinin artırılması, yeni texnologiyaların tətbiqi, təbliğat-təşviqat işlərinin aparılması, əmək yarmarkalarının keçirilməsi üzrə tədbirlərin təşkilinə 390 min manat vəsaitin ayrılması nəzərdə tutulub.

Fevralın 22-nə rəsmi məzənnə 0,7946 AZN/USD təşkil edir.

Xəbər lenti

Xəbər lenti