...

2011-ci ildə Azərbaycanın dövlət büdcəsinə neft sektorundan daxilolmalar proqnozu ötə bilər

Biznes və iqtisadiyyat xəbərləri Materials 25 Fevral 2011 16:05 (UTC +04:00)

Trend-i buradan izləyin

Azərbaycan, Bakı, 25 fevral /Trend, müxbir N.İsmayılova/

Azərbaycan hökuməti 2011-ci ildə dövlət büdcəsinin 2011-ci il üçün proqnozlarına yenidən baxa biləcəyini istisna etmir.

"Biz 2011-ci il dövlət büdcəsinin proqnozlarına yenidən baxa bilmək imkanını istisna etmirik. Əvvəlki illərdə olduğu kimi, ölkədə makroiqtisadi vəziyyət imkan versə, bu məsələlərə yenidən baxıla bilər", - cümə günü jurnalistlərə Azərbaycanın maliyyə naziri Samir Şərifov deyib.

2011-ci il dövlət büdcəsinin gəlirləri 12 061 milyon manat, xərcləri isə 12 748 milyon manat məbləğində təsdiq edilib.

Dünya bazarlarında neftin qiymətinin artması ilə əlaqədar dövlət büdcəsinə də daxilolmaların artacağı gözlənilir.

Nazirin sözlərinə görə, Azərbaycanın dövlət büdcəsinə Azərbaycan Beynəlxalq Əməliyyat Şirkətindən (ABƏŞ) gəlir vergisi üzrə daxilolmalar 2011-ci ildə proqnozu ötə bilər.

"Lakin neft gəlirlərinin 20-25 faizinin ABƏŞ-in, qalan hissəsinin isə Dövlət Neft Fondunun payına düşdüyünü nəzərə alsaq, bu artım yüksək səviyyədə gözlənilmir", - nazir qeyd edib.

"Bunun hamısı hesablanacaq və iqtisadi baxımdan əsaslandırılsa, müəyyən tədbirlər görüləcək", - nazir vurğulayıb.

Neft məhsullarını əsasən qiymətin artmadığı yerli bazarda satan ARDNŞ-dən daxilolmalara gəldikdə, artım gözlənilmir.

"Biz ARDNŞ xətti ilə gəlir vergisi üzrə daxilolmaların artımını gözləmirik", - Şərifov qeyd edib.

Bununla yanaşı, 2011-ci ildə ARDNŞ-dən daxilolmalar 680 milyon manat, ABƏŞ-dən isə 600 milyon manat məbləğdə proqnozlaşdırılır. ABƏŞ "Azeri Light" növlü neftin hasil edildiyi Azərbaycanın "Azəri-Çıraq-Günəşli" yataqlar blokunun işlənməsinin operatorudur.

Dövlət Neft Fondunun transfertləri 6,48 milyard manat səviyyəsində proqnozlaşdırılır. Bu göstərici 2010-cu ildə 5,915 milyard manat olub.

2010-cu ildə ABƏŞ-dən daxilolmalar 741,1 milyon manat təşkil edib. Bu göstərici 650 milyon manat proqnozlaşdırılmışdı.

Bundan əvvəl ölkə hökumətindən deyildiyi kimi, 2011-ci ildə Azərbaycanın "Azeri Light" markalı neftinin hasil olunduğu iri "Azəri-Çıraq-Günəşli" (AÇG) yataqlar blokunun işlənməsi üzrə operator olan ABƏŞ üçün mənfəət vergisindən daxilolmaların 650 milyon manatdan 600 milyon manatadək azalması 2013-cü ilədək altı milyardlıq "Chirag oil project" layihəsinin həyata keçirilməsi ilə əlaqədardır.

"Bu, layihənin iştirakçısı olan neft şirkətlərinin xərclərinin artmasına, müvafiq olaraq, onların mənfəətinin azalmasına gətirib çıxaracaq", - hökumətdən deyiblər.

"Chirag oil project" altı milyard dollar məbləğində sərmayəni nəzərdə tutur. "Azəri-Çıraq-Günəşli"də neft hasilatının artırılması çərçivəsində tikiləcək yeni platformadan "Azeri Light" növlü neftin hasilatının sutkalıq həcminin 183 min barel təşkil edəcəyi planlaşdırılıb. Yeni platformadan sutkada 6,5 milyon kubmetr qaz hasil ediləcəyi gözlənilir. Platformada sutkalıq qaz vurulması həcminin təxminən 2,3 milyon kubmetr olacağı nəzərdə tutulub.

Layihə çərçivəsində qabaqlayıcı qazma işləri 2010-cu ilin ikinci və 2012-ci ilin birinci dövrünü əhatə edir. Qazma işləri "Dədə Qorqud" qurğusundan həyata keçiriləcək. Platformadan hasilat 2013-cü ilin sonuna planlaşdırılıb.

Layihənin həyata keçirilməsi çərçivəsində (AÇG üzrə müqavilənin 2024-cü ilədək qüvvədəolma müddəti) ümumilikdə 300 milyon barel neft hasilatı planlaşdırılıb.

"Azəri-Çıraq-Günəşli" layihəsinin iştirakçıları aşağıdakılardır: BP (operator - 37,43 faiz iştirak payı), "ChevronTexaco" (11,27 faiz), ARDNŞ (10 faiz), INPEX (10,96 faiz), "Statoyl" (8,56 faiz), "ExxonMobil" (8,006 faiz), TPAO (6,75 faiz), "Itochu" (4,3 faiz), "Delta Hess" (2,72 faiz).

Qarşıdakı ildə Azərbaycanda neft hasilatı həcmləri ildə 51 554,2 min ton səviyyəsində proqnozlaşdırılır. Bu həcmdən 43 054,2 min ton "Azəri-Çıraq-Günəşli" yataqlar blokundan hasil olunan "Azeri Light" marfkalı neftin payına düşür, 8,5 milyon ton neft isə ARDNŞ tərəfindən özünün qurudakı və dənizdəki yataqlarından hasil ediləcək.

2011-ci ildə 29 135,9 milyon kubmetrədək qaz hasilatı proqnozlaşdırılır ki, bunun da 18 179,2 milyon kubmetri satış üçün nəzərdə tutulub. 2010-cu ildə isə qaz hasilatı 27 078,9 milyon kubmetr həcmində nəzərdə tutulmuşdu ki, bunun da 17 637,7 milyon kubmetri satış üçün idi.

Fevralın 25-nə olan rəsmi məzənnə 0,7941 AZN/USD təşkil edir.

Xəbər lenti

Xəbər lenti