Azərbaycan, Bakı, 19 mart /Trend, müxbir Ü.İsmayılova/
Azərbaycanın sığorta şirkəti "A-Qroup" 2011-ci il ərzində nizamnamə kapitalını 1,5 dəfə artıracaq. Bu barədə şənbə günü Trend-ə şirkətin idarə heyətinin sədri Anar Bayramov bildirib.
"Şirkətin kapitalı 2010-cu ildə əldə olunan 260 min manat mənfəət hesabına artırılacaq", - Bayramov deyib.
Onun sözlərinə görə, Azərbaycan Maliyyə Nazirliyinin minimum tələblərinə uyğun olaraq, 2012-ci il yanvarın 1-dək şirkətin məcmu kapitalı dörd milyon manata çatdırılacaq.
Bayramov bildirib ki, bu gün şirkətin nizamnamə kapitalı 2,65 milyon manat təşkil edir.
"A-Qroup" 1995-ci ildən sığorta bazarında fəaliyyət göstərir və müştərilərə sığortanın üç icbari, 14 könüllü növü üzrə xidmət edir.
Yanvar-fevralda şirkətin slğorta haqları 3,312 milyon manat, ödənişləri isə 0,04 milyon manat təşkil edib.
Martın 19-na olan rəsmi məzənnə 0,7932 AZN/USD təşkil edir.
