Azərbaycan, Bakı, 31 mart /Trend, müxbir N.İsmayılova/
Dünya Bankı (DB) Azərbaycanda məhkəmə-hüquq sisteminin modernləşdirilməsi layihəsinə əlavə maliyyələşdirmə üçün güzəştli kredit ayırmağa hazırdır. Bu barədə cümə axşamı DB-nin Bakı nümayəndəliyindən bildirilib.
Azərbaycanda məhkəmə-hüquq sisteminin müasirləşdirilməsi layihəsinin reallaşdırılması gedişinin icmalının aparılması üçün martın 28-dən aprelin 2-dək Dünya Bankının (DB) layihə rəhbəri Klaus Dekkerin başçılığı ilə missiyası Bakıda olacaq.
"DB-nin verəcəyi əlavə maliyyələşmənin həcmi 32 milyon dollar təşkil edəcək. Bunun 8,6 milyon dolları Beynəlxalq İnkişaf Assosiasiyasının (BİA) payına düşür", - nümayəndəlikdən bildirilib.
Güzəştli maliyyələşdirmə üçün vəsaitlər DB-nin əvvəllər ləğv etdiyi "Azərbaycan - kənd və ətarf mühit" layihəsinin kreditlərindən istifadə ediləcək. Layihənin ümumi dəyəri 17,1 milyon dollar təşkil edib. Bunun 8 milyon dolları BİA-nın, 5 milyon dolları Qlobal İqtisadi Fond və 2,72 milyon dolları Yaponiya hökumətinin payına düşüb. Layihədə Azərbaycanın payı 1,38 milyon dollar təşkil edib. Layihə üç əsas komponentdən ibarət olub və onun əsas məqsədi iki dağlıq rayonda biomüxtəlifliyin qorunması, təbii ehtiyatların idarə edilməsi, ekoloji sağlamlığın və bu ərazilərdəki meşələrinin məhsuldarlığının bərpasından ibarət olub.
"BİA-nın ləğv edilən layihə çərçivəsində ayrılan kreditinin bir hissəsindən istifadə edilib, 7 milyon dollara yaxın yerdə qalan hissə isə məhkəmə-hüquq sisteminin modernləşdirilməsi layihəsinin əlavə maliyyələşdirilməsinə yönəldiləcək", - DB-dən bildirilib.
DB-dən verilən məlumata görə, bu layihə üçün hökumət tərəfindən maliyyələşdirmənin həcmi dəqiqləşdirilməyib və müzakirələr davam edir.
Layihənin ümumi dəyəri 35,6 milyon dollar təşkil edir. Bankın kredit payı 21,6 milyon dollardır. Yaponiyanın xüsusi fond hesabından 3 milyon dollar qrant ayrılıb, Azərbaycan hökumətinin iştirak payı 11 milyon dollardır. Layihə beş ilə hesablanıb.
Bu gün layihə üzrə Ali Məhkəmənin, Konstitusiya Məhkəməsinin, Ədliyyə Nazirliyinin qeydiyyat orqanlarının, eləcə də Məhkəmə-Hüquq Şursının binalarının kompüterləşdirilməsi və texniki təchizatı üzrə işlər aparılır.
DB-nin krediti Beynəlxalq İnkişaf Assosiasiyası xətti ilə standart şərtlərlə 35 il müddətinə 10 illik güzəştli dövr olmaqla və illik 0,75 faizlə verilib. 10 illik güzəştli müddət bitdikdə, kreditin 1,25 faizlə ödənilməsinə başlanılacaq. 2026-cı ildən 2041-ci ilədək 2,5 faizlə ödəniləcək.
DB-nin Direktorlar Şurası 2006-cı il iyunun 29-da Azərbaycanın məhkəmə-ədliyyə sistemi üçün krediti təsdiq edib.
Layihə 4 komponentdən ibarətdir:
- idarəetmənin kompüter sisteminin, məlumat şəbəkəsi və treyninqin yaradılması ilə hüquq institutlarının idarəetmə bacarığının gücləndirilməsi;
- məhkəmənin imkanlarının artırılması - məhkəmə binalarının tikintisi və təmiri, idarəetmə sistemində müasir texnologiya və kompüterləşmənin tətbiqi;
- hakimlərin peşəkarlığının treyninqlər və mütəmadi təlimlər vasitəsilə gücləndirilməsi;
- vətəndaşların notariatda qeydiyyatı barədə olan məlumata daxil olmağa imkan verən mülki məlumatlandırma proqramları.
