Azərbaycan, Bakı, 18 iyun /Trend, müxbir İ.Xəlilova/
Azərbaycanda tibbi sığortanın inkişafı səhiyyə sistemində ciddi islahatlarla müşayiət edilməlidir. Azərbaycanın maliyyə nazirinin müavini Azər Bayramov bu qənaətdədir.
"Tibbi sığorta çox mühüm məsələdir, lakin ilkin olaraq səhiyyə sistemində iş prinsipi və maliyyələşdirmə dəyişdirilməlidir, - Bayramov bildirib. - Bu halda biz büdcə maliyyələşdirməsindən tibbi sığorta sisteminə tam keçməliyik. Buna uyğun olaraq sistem özü buna hazır olmalıdır".
Onun sözlərinə görə, həm də tibbi sığortanın tətbiqi maliyyə bazarının canlanmasına, tibbi xidmətlərin keyfiyyətinin yüksəlməsinə səbəb ola bilər, lakin buna qədər ciddi islahatların aparılması lazımdır.
Parlamentin Sosial siyasət komitəsinin sədri Hadı Rəcəbli hesab edir ki, Milli Məclisdə üçüncü oxunuşda müzakirə edilən "Sığortanın icbari növləri haqqında" qanuna sığortanın bu növünün daxil edilməsi onun tətbiqi prosesini tezləşdirməyə imkan verəcək.
"Dövlət büdcəsində 3 ildir tibbi sığorta üçün vəsaitlərin toplanmasına baxmayaraq, onlardan istifadə edilmir və bundan sonra tibbi sığortanın pilot layihələrinin həyata keçirilməsi geniş tətbiq edilməyib, - Rəcəbli bildirib. - Halbuki tibbi sığorta tibb işçilərinin əməkhaqlarının artırılmasında və əhalinin sosial müdafiəsində böyük rol oynaya bilər".
Onun fikrincə, ilkin mərhələdə tibbi sığortanın tətbiqində büdcə maliyyələşdirilməsi müəyyən fond formalaşdırılanadək saxlanılmalıdır.
Parlamentin İqtisadi siyasət komitəsinin sədri Ziyad Səmədzadə payızda parlamentin Sosial siyasət komitəsində Maliyyə və Səhiyyə nazirliklərinin nümayəndələri ilə ölkədə lazımi tibbi sığorta sisteminin yaradılması məqsədilə müzakirələrə başlamağı təklif edib.
"Hazırda səhiyyənin adambaşına düşən xərcləri 40 manatı ötür, halbuki 5 il ərzində onlar 4-5 dəfə artıb. Avropa ölkələrində bu xərclər 2-3 min avroya çatır, - Səmədzadə bildirib. - İndiki şəraitdə dövlət bu xərcləri məhdudlaşdırsa, səhiyyə sistemi böyük problemlərlə qarşılaşacaq.
Bu çox ciddi məsələdir və biz büdcə stukturuna baxmalıyıq. Tibbi sığortaya keçərkən hər şeydən əvvəl özəl tibb müəssisələrinin imkanlarını və onların bu prosesə hazır olmasını müəyyən etmək lazımdır".
Onun sözlərinə görə, Beynəlxalq Valyuta Fondunun ekspertləri Azərbaycanın büdcə xərclərini artırmasını tənqid edirlər, lakin onların azaldılması səhiyyə üçün dövlət xərclərinin optimal səviyyəsinə nail olduqdan sonra mümkündür. Bundan sonra Azərbaycanda tibbi sığorta sisteminin yaradılması yollarını müəyyən etmək olar.
"Tibbi sığorta haqqında" qanun 1999-cu ildə qəbul edilib. Azərbaycan Almaniya, Niderland, Norveç və Rusiyada bu mexanizmdən istifadənin təcrübəsini öyrənib.
Tibbi sığorta icbari və könüllü formada həyata keçirilir. İcbari tibbi sığorta dövlət sosial sığortanın tərkib hissəsi olmaqla əhalinin tibbi və dərman yardımını icbari tibbi sığorta proqramına uyğun həcmdə almasını təmin edir.
Könüllü tibbi sığorta icbari tibbi sığorta proqramında müəyyən edilənlə yanaşı, əhalini tibbi və digər xidmətlərlə könüllü tibbi sığorta haqqında müqavilə əsasında təmin edir.