Azərbaycan, Bakı, 5 sentyabr /Trend, müxbir N.İsmayılova/
Azərbaycanda elektrik enerjisinin paylanmasının inkişafı layihəsinin Asiya İnkişaf Bankının Direktorlar Şurası tərəfindən təsdiqi tarixi 30 iyun 2012-ci il müəyyənləşdirilib. Trend-in məlumatına görə, bu barədə bankın saytındakı məlumatda deyilir.
Məlumatda bildirilir ki, layihənin ilkin qiyməti 150 milyon dollardır.
Bank "Azərenerji" ASC üçün "Power Distribution Development Investment" adlı isvestisiya proqramı hazırlayıb. Onun həyata keçirilməsi üçün AİB Azərbaycana 500 milyon dollarlıq çoxtranşlı maliyyələşdirmə təqdim etməyi planlaşdırır.
Həmin proqramın tətbiqi ilə paylanma əsnasında elektrik enerjisi itkisi 2010-cu ildə 15 faizdən 2015-ci ildə 6 faizədək azalacaq. Həmçinin, bu əməkdaşlıq istehlak olunan elektrik enerjisinin 2010-cu ildə 70-80 faiz olan ödənişinin 2015-ci ildə 100 faizə qədər effektiv artımını təmin edəcək.
AİB 1966-cı ildə yaradılıb və 67 üzvü var. Bankın mənzil-qərargahı Manilada (Filippin) yerləşir. Azərbaycan AİB üzvlüyünə 22 dekabr 1999-cu ildə qəbul edilib və ölkənin bankın kapitalındakı iştirak payı 0,5 faizdir.
AİB-in aparıcı səhmdarları Yaponiya və ABŞ (ümumi səhmdar kapitalının 31,2 faizi), Hindistan və Çin (12,8 faiz), Avstraliya, Cənubi Koreya, Kanada (16 faiz) və başqalarıdır.