Azərbaycan, Bakı, 1 noyabr /Trend, müxbir A.Axundov/
Azərbaycan Kənd Təsərrüfatı Nazirliyi qarşıdakı ildə əkin sahələrinin artırılmasına lüzum görmur. Trend-in məlumatına görə, bu barədə çərşənbə axşamı jurnalistlərə kənd təsərrüfatı naziri İsmət Abasov deyib.
"Azərbaycan üçün hazırda lazım olan sahələr kifayət qədərdir. Lakin bu ərazilərin səmərəli istifadəsi, məhsuldarlığın artırılması üçün keyfiyyətli toxumların və mineral gübrələrin tətbiq edilməsi çox vacibdir. Ötən illə müqayisədə bu il məhsuldarlıq 5,2 faiz artıb", - Abasov bildirib.
2011-ci ildə Azərbaycanda əkin sahələri 5,8 faiz və ya 21,643 min hektar artıb. Ölkədə 397,297 min hektar ərazidə yaz bitkilərinin səpini həyata keçirilib.
Abasovun sözlərinə görə, nazirliyin məqsədi hər il kənd təsərrüfatı məhsulunun hər növü üzrə 10 faizlik artım əldə etməkdir.
2011-ci ilin doqquz ayı ərzində Azərbaycanda kənd təsərrüfatı məhsullarının istehsalı ötən ilin analoji dövrü ilə müqayisədə 7,6 faiz artıb, o cümlədən bitkiçilik 10,6 faiz, heyvandarlıq isə 3,7 faiz artıb.
Kənd təsərrüfatı nazirinin müavini Bəhram Əliyevin bir müddət əvvəl dediyinə görə, kənd təsərrüfatı bitkilərinin orta məhsuldarlığını növbəti ildən etibarən hektardan 50 sentner göstəricisindən yüksəyə çatdırmaq planlaşdırılır.
"Bəzi rayonlarda kənd təsərrüfatı bitkilərinin orta məhsuldarlığının 50 və 60 s/ha-ya çatmasına baxmayaraq, ölkə üzrə orta məhsuldarlıq 25 s/ha-nı ötmür. Əsas məqsədimiz göstəricini 50 s/ha-ya çatdırmaqdır", - Əliyev deyib.
Onun sözlərinə görə, bu məqsədlə ölkədə yeni texnologiyaların tətbiqinə başlanıb ki, bu da istehsalın həcmini artırmağa, suya və gübrələrə qənaət etməyə imkan verir. Həmçinin, məhsuldarlığı çox olan yeni bitki növləri də gətirilir.
"Hazırda bu məqsədlə konkret layihələr həyata keçirilir. Kənd təsərrüfatı bitkilərinin yetişdirilməsində yeni texnologiyaların inkişafı üçün əsas şərtlərdən biri yüksək məhsuldarlığa malik toxumların köçürülməsi, növbəli əkin sisteminin tətbiqi, eləcə də bitkilərin mühafizəsi məsələsinə diqqətin artırılmasıdır", - Əliyev deyib.
Onun sözlərinə görə, bununla yanaşı, gözlənilməz iqlim dəyişikliklərini də nəzərə almaq lazımdır.
"Bizim əkinçilik sistemimiz iqlim dəyişikliklərindən və qlobal istiləşmədən güclü şəkildə asılıdır ki, bunu da nəzərə almaq vacibdir", - Əliyev bildirib.