Azərbaycan, Bakı, 27 dekabr /Trend, müxbir N.İsmayılova/
Hazırda banklar tərəfindən təqdim edilən platformalar vasitəsilə "Forex" bazarlarına çıxış daha təhlükəsiz və etibarlıdır. Bu barədə çərşənbə axşamı Trend-ə Azərbaycan Mərkəzi Bankından (AMB) məlumat veriblər.
Mərkəzi Bankının qərarı ilə 2011-ci ildən Azərbaycanda birjadankənar beynəlxalq valyuta bazarı "Forex"də əməliyyatlar yalnız bank təşkilatları vasitəsilə aparılır.
Hazırda Azərbaycanda belə platformaya iki bank sahibdir - "Texnikabank" və "MuğanBank". "MuganBank"da "Forex" bazarında iş üçün ticarət platforması 2010-cu il iyulun 19-da işə salınıb. "Texnikabank" belə əməliyyatların keçirilməsinə 2011-ci ildə başlayıb.
Lakin Azərbaycan ərazisində "Forex" əməliyyatlarının təşkili üçün Beynəlxalq Birja Ticarəti Akademiyası/"Forex Club" və "Alpari"nin rəsmi tərəfdaşı kimi şirkətlər fəaliyyət göstərir.
AMB hesab edir ki, "Forex" bazarlarında həyata keçirilən əməliyyatlar öz mahiyyətinə görə riskli fəaliyyətdir. Buna görə də "Forex" əməliyyatları üzrə treydinqlərin həyata keçirildiyi platformalara çıxış imkanlarını təmin edən şirkətlərin peşəkarlığı, dürüstlüyü, reputasiyası, maliyyə imkanları və fəaliyyətinin qanunvericiliyə uyğun qurulması da mühüm amillərdir.
"Bu şirkətlər tərəfindən "Forex" əməliyyatlarının mahiyyəti, risklər müştərilərə ətraflı açıqlanmalı və izah edilməlidir. Bir sıra hallarda bu şirkətlər tərəfindən qeyri-qanuni olaraq "Forex" xidmətləri ilə yanaşı, əhalidən pul vəsaitlərinin qəbul edilməsi, aktivlərin idarəçiliyə götürülməsi kimi xidmətlər də təklif olunur. Məlumdur ki, depozit əməliyyatları yalnız müvafiq bank lisenziyasına malik institutlar tərəfindən həyata keçirilə bilər", - AMB-dən bildiriblər.
