Azərbaycan, Bakı, 12 yanvar /Trend, müxbir A.Axundov/
Azərbaycanda "İcbari sığortalar haqqında" qanunun tətbiqinə başlandığı iki həftə ərzində İcbari Sığorta Bürosuna daxil olan şirkətlər 2011-ci ilin sonlarına olan vəziyyətə görə, bu qanunla tənzimlənən icbari növlər üzrə 98,5 min manat həcmində vəsait toplayıblar. Trend-in məlumatına görə, bu barədə Azərbaycan Maliyyə Nazirliyinin 2011-ci ildə sığortaçıların fəaliyyətinin yekunları üzrə hesabatında deyilir. Hesabat nazirlik yanındakı Dövlət Sığorta Nəzarəti Xidmətinin saytında dərc olunub.
Büro "İcbari sığortalar haqqında" yeni qanunun tələblərinə uyğun yaradılıb. Qanun icbari sığortanın dörd növünü - daşınmaz əmlakın, avtonəqliyyat vasitələri sahiblərinin məsuliyyəti, sərnişinlərin və daşınmaz əmlakın istismarı zamanı vətəndaş məsuliyyətinin sığortalanmasını tənzimləyir. "İcbari sığortalar haqqında" qanunun tətbiqinə 2011-ci ilin sonlarından başlanılıb.
6 şirkət büronun təsisçiləridir. Bunlar "Paşa Sığorta", "Atəşgah Sığorta", "Ata Sığorta", AXA MBASK, "Xalq Sığorta" və "Standard Insurance" şirkətləridir. Az sonra büroya "AzSığorta" şirkəti də qoşulub.
"AzSığorta" istisna olmaqla, bütün bu şirkətlər icbari sığortanın 3 növü - avtonəqliyyat vasitələri sahiblərinin məsuliyyəti, daşınmaz əmlak və daşınmaz əmlakın istifadəsi zamanı mülki məsuliyyət üzrə xidmətlər göstərəcək. "Atəşgah Sığorta" ancaq avtonəqliyyat vasitələri sahiblərinin məsuliyyəti sığortası üzrə işləyəcək. Yəni bu gün Azərbaycanda sərnişinlərin icbari sığortası hələ işləmir.
DSNX-nin məlumatına əsasən, şirkətlər qanunun tətbiqinə başlandıqdan sonra avtonəqliyyat vasitələri sahiblərinin məsuliyyəti üzrə 98 320 manat, əmlakın icbari sığortası üzrə 150 manat, daşınmaz əmlakın istismarı zamanı vətəndaş məsuliyyətinin sığortası üzrə 30 manat toplayıblar.
2011-ci ildə bu növlər üzrə ödəniş olmayıb.
Azərbaycanda 29 sığorta və bir təkrarsığorta şirkəti fəaliyyət göstərir. Bununla yanaşı, "Fidan Sığorta" şirkətinin sığorta fəaliyyəti üzrə lisenziyası müvəqqəti dayandırılıb.
Yanvarın 12-nə rəsmi məzənnə 0,7864 AZN/USD təşkil edir.
