Azərbaycan, Bakı, 31 yanvar /Trend, müxbir A.Axundov/
2011-ci ildə Azərbaycanın "Atəşgah Həyat" həyat sığortası şirkətinin yığımlarının 66,8 faizi işçilərin istehsalatda bədbəxt hadisələr və peşə xəstəliklərdən icbarı sığortasının payına düşür. Bu barədə çərşənbə axşamı Trend-ə şirkətdən məlumat veriblər.
Şirkət 2010-cu ilin dekabrda Azərbaycanda tətbiq edilməyə başlanılan sığortanın bu növü üzrə 6,36 milyon manat yığıb.
Şirkətin 2011-ci ildə ümumilikdə mükafatları 9,52 milyon manat səviyyəsində olub.
Şirkət həyatın ölüm halından könüllü sığortası üzrə 1,11 milyon manat, həyatın sığortası yığımı üzrə isə 2,06 milyon manat toplayıb.
Şirkətin ödənişlərinin 60 faizi və ya 99 633,69 manat həyatın ölüm halından könüllü sığortası üzrə həyata keçirilib. Şirkət icbari sığorta üzrə 69 924,36 manat ödəyib. Şirkətin 2011-ci ildə ümumilikdə ödənişləri 169 558,05 manat olub.
2008-ci ilin dekabrlında təsis edilən "Atəşgah Həyat" SŞ ölkədə həyat sığortası üzrə ilk şirkətdir.
Şirkət həyat sığortası üzrə həyatın müddətli sığortası, yığım sığortası, kredit həyat sığortası, həyatın ağır xəstəliklərdən sığortası, istehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta xidmətlərini təklif edir.
Yanvarın 31-nə olan rəsmi məzənnə 0,7864 AZN/USD təşkil edir.