Azərbaycan, Bakı, 12 aprel /Trend, müxbir A.Axundov/
Azərbaycan və Gürcüstana birgə sərhəddə gömrük nəzarət məntəqələrinin sayını artırmaq lazımdır. Bu barədə cümə axşamı Trend-ə Gürcüstan Gömrük Xidmətinin Beynəlxalq əlaqələr departamentinin rəhbəri Samson Uridia bildirib.
Onun sözlərinə görə, ölkələr arasında nəqliyyat dövriyyəsinin həcmini artırmaq üçün gömrük nəzarət məntəqələrinin sayını artırmaq və digər tədbirlər görmək lazımdır.
"Belə ki, bizim regionumuz tranzit regionudur, Azərbaycan və Türkiyə ilə olduqca perspektiv tranzit dəhlizi mövcuddur. Biz mal dövriyyəsinin və nəqliyyat axınlarının genişləndirilməsinə hər cür kömək etməliyik. Azərbaycanın bu sahədə vacib rolunu qeyd etmək istərdim", - Uridia deyib.
Onun sözlərinə görə, tərəflər mövcud imkanların genişləndirilməsi, Azərbaycan-Gürcüstan sərhədində gömrük prosedurlarının sadələşdirilməsi və sürətləndirilməsi üçün işləməlidirlər.