Azərbaycan, Bakı, 26 iyul /Trend, müxbir İ.Xəlilova/
İslam İnkişaf Bankı (İİB) və "Azəryolservis" SC Zərdab-Ucar-Ağcabədi yolunun modernləşdirilməsi və yenidən qurulması layihəsinin texniki iqtisadi əsaslandırılmasının (TİƏ) hazırlanması üçün məsləhətçinin seçim prosesini başa çatdırıblar. Bu barədə cümə axşamı Trend-ə bankın Bakı ofisindən məlumat veriblər.
"Müqavilənin avqustda imzalanması gözlənilir, texniki tapşırığa müvafiq olaraq, məsləhətçi işi il ərzində başa çatdırmalıdır", - ofisdən deyiblər.
Layihənin TİƏ-sini Banqladeş şirkəti hazırlayacaq. Bunun üçün bank Azərbaycana texniki kömək qismində 294 min dollar həcmində qrant ayırıb.
Bu layihənin maliyyələşdirilməsi İİB-in Azərbaycan hökuməti ilə yeni əməkdaşlıq proqramı (2011-2013-cü illər üçün) çərçivəsində nəzərdə tutulub, lakin layihənin dəyəri TİƏ-nin hazırlanmasından sonra müəyyənləşəcək.