Azərbaycan, Bakı, 4 dekabr /Trend, müxbir A.Axundov/
Azərbaycan İnvestisiya Şirkəti (AİŞ) iki iri layihədəki payını satır. Bu barədə çərşənbə axşamı Trend-ə şirkətin Müşahidə Şurasının rəhbəri, ölkənin iqtisadi inkişaf naziri Şahin Mustafayev bildirib.
"AİŞ-in əsas məqsədi yerli və xarici sərmayədarlarla yanaşı qeyri-neft sektorunun prioritet istiqamətləri üzrə layihələrdə uğurla iştirak etməkdir. Biz artıq iki layihədə öz məqsədlərimizə çatmışıq", - Mustafayev deyib.
Onun sözlərinə görə, AİŞ "Azərduz" İstehsalat Birliyi və "Səngəçal-Qaradağ Neft-Qaz Terminalı" QSC-də öz payını başqa səhmdarlara satır.
"Əsas səhmdarlar AİŞ-in duz istehsalı zavodunda və Qaradağ terminal kompleksindəki payını alır. Həmin layihələr gəlirli oldu və səhmdarlar bundan razıdır", - Mustafayev qeyd edib.
Qeyd edək ki, AİŞ 2006-cı il martın 30-da ölkə Prezidentinin sərəncamı ilə yaradılıb.
