Azərbaycan, Bakı, 30 sentyabr /Trend, müxbir T.Cəfərov/
Bu ilin (İranda il martın 21-də dəyişir) ilk 6 ayı ərzində İrandan Azərbaycana 9 milyon dollar həcmində ("portfel ticarəti" vasitəsilə) məhsul ixrac edilib. Bunu Astara şəhərinin gömrük məntəqəsinin direktoru Cahangir Bəxşi deyib. Trend-in məlumatına görə, bu barədə İSNA agentliyi xəbər verir.
Onun sözlərinə görə, İran ilin ilk altı ayında Azərbaycana altı min ton məhsul ixrac edib.
Bəxşinin sözlərinə görə, İran və Azərbaycan arasında əsasən "portfel ticarəti" aparılır və malların böyük hissəsi Azərbaycana turistlər vasitəsilə ixrac edilib.
Bəxşi deyib ki, bu müddət ərzində 341 min 723 nəfər turist Astara sərhəd keçid məntəqəsi vasitəsi ilə gediş-gəliş edib. Onun sözlərinə görə, plastik və şüşə qablar, keramika, meyvə və tərəvəz Azərbaycana ən çox ixrac olunan mallardır.
Qeyd edək ki, bu ilin ilk beş ayı ərzində isə İrandan Azərbaycana 7 milyon 540 min dollar (4 920 ton) həcmində (portfel ticarəti vasitəsilə) məhsul ixrac edilib.
Həmçinin həmin müddət ərzində 276 min 890 nəfər turist Astara sərhəd keçid məntəqəsi vasitəsilə gediş-gəliş edib.
