Azərbaycan, Bakı, 23 noyabr /Trend, müxbir T.Cəfərov/
Biləsuvar sərhəd-keçid məntəqəsindən cari ilin səkkiz ay ərzində (İranda il martın 21-də dəyişir) Azərbaycana "portfel ticarəti" vasitəsilə dörd milyon 224 min dollar məbləğində məhsul ixrac edilib. Bunu İranın Biləsuvar şəhərinin gömrük məntəqəsinin direktoru Əhəd Məhəmmədi deyib. Trend-in məlumatına görə, bu barədə İRİBNEWS xəbər yayıb.
Ə.Məhəmmədinin sözlərinə görə, bu müddət ərzində İrandan Azərbaycana gələn turistlər (sərnişinlər) vasitəsilə ("portfel ticarəti" vasitəsilə) 3185 ton məhsul ixrac olunub.
Ə.Məhəmmədi bildirib ki, "portfel ticarəti" vasitəsilə ixrac olunan məhsulların həcmində 11 faiz artım olub.
O, həmçinin deyib ki, bu müddət ərzində Biləsuvar sərhəd-keçid məntəqəsindən 690 min nəfər gediş-gəliş edib ki, bu da ötən ilin eyni dövrü ilə müqayisədə 25 faiz çoxdur.
Qeyd edək ki, cari ilin ilk 6 ayı ərzində İrandan Azərbaycana Astara sərhəd-keçid məntəqəsi vasitəsi ilə 9 milyon dollar həcmində ("portfel ticarəti" vasitəsilə) məhsul ixrac edilib. İxrac edilmiş məhsulun çəkisi 6 min ton olub.
