Azərbaycan, Bakı, 17 fevral /Trend, müxbir E.Əliyev/
Azərbaycanda kiçik biznes elektron ticarətə fəal şəkildə cəlb olunmalıdır. "Millikart Group" prosessinq mərkəzinin icraçı direktoru Cəlal Orucov belə hesab edir.
C.Orucov Trend-ə bildirib ki, bu sahəni nəzərdən qaçırmaq olmaz: "Bizim prosessinq mərkəzi daxilində ötən il elektron əməliyyatların həcmi təxminən 56 milyon manat təşkil edib, lakin bu həcmin böyük hissəsini əməliyyatların həm sayına, həm də həcminə görə mobil rabitə və kommunal xidmətlərin ödənişi təşkil edir. Elektron ticarət üzrə tranzaksiyaların həcmi çox azdır və onların üzərində çalışmaq vacibdir".
Ekspert hər hansı ödəniş kartının sahibi olmayan müştərilərin nağdsız ödənişlərə daha fəal şəkildə cəlb edilməsini digər mühüm vəzifə sayır: "Bu məsələdə bazarın cari vəziyyətini və müştərinin mentalitetini nəzərə almaq lazımdır. Hesab edirəm ki, əvvəlcədən ödənişli hədiyyə kartlar yaxşı qərar olardı. Müştəriyə banka getmək, müqavilə bağlamaq, vaxt itirmək lazım deyil. O, sadəcə kartı alır və orada olan vəsaitdən istifadə edir".
Onun sözlərinə görə, kiçik və orta sahibkarları elektron biznesə cəlb etmək lazımdır: "Öz növbəsində, bunun üçün müəyyən, ola bilsin ki, müvəqqəti vergi güzəştləri faydalı ola bilərdi. Bu, həmin sahənin artımını stimullaşdırmağa imkan verərdi. Hesab edirəm ki, bank ictimaiyyəti ölkənin Vergilər Nazirliyi ilə birlikdə bunun üzərində işləməlidir".
Mərkəzin rəhbəri qeyd edib ki, son illər ölkədə Vergilər Nazirliyi ilə birlikdə nağdsız əməliyyatların bəzi vergi növlərindən azad edilməsi və onların dərəcələrinin aşağı salınması imkanları öyrənilir: "Əgər belə təşəbbüs qəbul edilsə və reallaşdırılsa, o zaman bu, təsərrüfat subyektləri üçün çox maraqlı təklif olacaq. Onlara artıq tanış olduqları iri məbləğdə nağdsız hesablaşmaların üstünlüklərini izah etməyə ehtiyac yoxdur. Eyni zamanda, belə imkanlara malik kiçik və orta biznesə maraq göstərmək mümkündür və lazımdır".