Azərbaycan, Bakı, 2 iyun /Trend, müxbir Z.Qurbanova/
Azərbaycan Maliyyə Nazirliyi 2008-ci il avqustun 14-də "Günay Sığorta" ASC-yə verilmiş lisenziyanı bərpa edib. Bu barədə Trend Dövlət Sığorta Nəzarəti Xidmətinə istinadən məlumat verir.
Məlumatda deyilir: "Günay Sığorta" Açıq Səhmdar Cəmiyyətinin lisenziyasının qüvvəsinin dayandırılmasına əsas verən halların aradan qaldırılmasının cəmiyyət tərəfindən təmin edilməsi ilə əlaqədar, sığorta qanunvericiliyinə uyğun olaraq "Günay Sığorta" Açıq Səhmdar Cəmiyyətinə 14 avqust 2008-ci il tarixdə sığorta fəaliyyətinə verilmiş 042483 nömrəli lisenziyanın qüvvəsi 29 may 2014-cü il tarixdə bərpa edildi".
Qeyd edək ki, Müdafiə Nazirliyi 2014-cü il fevralın 24-də şirkətin lisenziyasının fəaliyyətini dayandırmışdı. Qanunvericiliyə uyğun olaraq, lisenziyanın bərpası üçün sığortaçı öz ümumi kapitalını altı ay ərzində Maliyyə Nazirliyinin minimal tələbi səviyyəsinə qədər çatdırmalı idi.