...

Azərbaycan-İran sərhədində yeni xüsusi iqtisadi zona yaradılacaq

Biznes və iqtisadiyyat xəbərləri Materials 7 Avqust 2014 16:35

Trend-i buradan izləyin

Azərbaycan, Bakı, 7 avqust /Trend, müxbir Təmkin Cəfərov/

Yaxın zamanlarda İranın Astara şəhərində yeni xüsusi iqtisadi zona yaradılacaq. Bunu Trend-ə cümə axşamı İranın Astara sərhəd-keçid məntəqəsinin rəisi Həmidrza Məhəmmədi deyib.

H.Məhəmmədi bildirib ki, Astarada yaradılacaq xüsusi iqtisadi zona yaxın iki-üç ay ərzində fəaliyyətə başlayacaq: "Azərbaycanla sərhəddə yerləşən Astara xüsusi iqtisadi zonası azərbaycanlı tacirlər və investorlar üçün iki ölkə arasında iqtisadi əlaqələrin inkişafı və İranda sərmayə yatırmaq üçün əlverişli şərait yaradacaq".

H.Məhəmmədi Astara şəhərində iqtisadi fəaliyyətlər üçün yaxşı şəraitin olduğunu vurğulayıb və deyib ki, Astara limanında ixracat və idxalat işləri davam etdirilir: "Limanda gömrük işçiləri üç növbədə çalışır və liman 24 saat fəaliyyət göstərir".

Astara sərhəd-keçid məntəqəsinin rəisi Astara limanının əsasən Bakı və Aktau limanları ilə əməkdaşlıq etdiyini bildirib: "Aktau limanından əsasən polad və dəmir İrana idxal olunur. İrandan Azərbaycana isə əsasən armatur, gips və sement ixrac edilir".

H.Məhəmmədi Astara sərhəd-keçid məntəqəsinin Azərbaycanla mövcud olan ən önəmli keçid məntəqəsi olduğunu bildirib və deyib ki, ötən il Astara sərhəd-keçid məntəqəsindən 800 min sərnişin gediş-gəliş edib.

Onun sözlərinə görə, Astara sərhəd-keçid məntəqəsində azərbaycanlı sərnişinlərin rahatlığını təmin etmək üçün bir sıra layihələrə start verilib: "Sərhəd-keçid məntəqəsində sərnişinlərin rahatlığı üçün müxtəlif şərait yaradılıb. Sıxlıq olan günlərdə Astara sərhəd-keçid məntəqəsinin iş saatı uzadılır. Müxtəlif bayram günlərində İranda olan azərbaycanlı qardaş-bacılarımıza müxtəlif hədiyyələr təqdim olunur. Azərbaycan və fars dillərində təlimat kitabçaları çap olunub. Həmin kitabçalarda sərnişinlərə özləri ilə İrandan Azərbaycana və əksinə hansı və nə həcmdə malı aparıb-gətirə biləcəkləri haqqında məlumatlar verilir".

Məqalədə:
Xəbər lenti

Xəbər lenti