Sentyabrın ortalarına qədər Ümumdünya Ticarət Təşkilatı (ÜTT) üzv ölkələrinin suallarına cavabların hazırlanması başa çatacaq. Bu barədə danışıqlar qrupunun başçısı, xarici işlər nazirliyinin müavini Mahmud Məmmədquliyev Trend ə eksklüziv olaraq bildirib.
"Hər halda sentyabr ayı ərzində biz cavabları ÜTT-nin katibliyinə göndərməliyik ki, onların 2 ay ərzində öyrənilməsi və ilin sonunadək danışıqların növbəti mərhələsinin keçirilməsi üçün vaxt olsun", - deyə nazir müavini qeyd edib.
Onun sözlərinə görə, həmçinin xidmət və mallar, onların Azərbaycan bazarına çıxarılmasının təmin edilməsi üzrə məsələlər müzakirə edilir. Ölkə yerli bazarı müdafiə etmək və idxal zamanı daha məqbul faiz dərəcələrini müəyyən etmək üçün mal və xidmətlərin prioritetliyini nəzərə almaqla möhkəmlənməlidir.
"Bu həftə ərzində səfər zamanı mən Brüsseldə AB-nin Ticarət departamentinin rəhbərliyi ilə görüşdüm və Azərbaycanın ÜTT-yə daxil olma məsələsini müzakirə etdim. Avropa Birliyi ÜTT-də başlıca oyunçudur, ona görə də bu beynəlxalq təşkilata daxil olma prosesində uğurun əldə olunması onunla əməkdaşlığın nəticələrindən asılıdır", - deyə M.Məmmədquliyev hesab edir.
Azərbaycan ÜTT-yə məqbul şərtlərlə daxil olmağa çalışır. Danışıqlar zamanı ölkəmiz əsas güzəştə - bir sıra sahələr üçün bir sıra vergi güzəştlərinin və subsidiyaların qorunmasına nail olmağa səy göstərməlidir. Bunun üçün Azərbaycanı ÜTT-yə inkişaf etməkdə olan ölkə statusu ilə qəbul etməlidirlər, çünki ÜTT-nin qaydalarına görə zəif ölkələr 10%-ə qədər maddi yardım almaq imkanını qoruyub saxlaya bilərlər. Ona görə də ölkə ÜTT iştirakçılarını inandırmalıdır ki, onlar Azərbaycanda iqtisadi inkişaf səviyyəsini energetika sektorunun böyük payının olduğu ÜDM-in ümumi göstəricisi üzrə qiymətləndirməsinlər. Yalnız qeyri-neft sektorunun payını nəzərə almaq lazımdır, çünki Azərbaycan bu göstərici üzrə inkişaf etməkdə olan dövlət statusuna uyğun gəlir.
