Baş nazir Mixail Fradkovun rəhbərliyi altında Rusiya nümayəndə heyətinin səfərinə hazırlıq çərçivəsində dekabrın 4-5-də Bakıda imzalanması nəzərdə tutulan sazişlər paketi işlənib hazırlanır.
RF-nin Azərbaycandakı ticarət nümayəndəliyindən Trend -ə verilən məlumata görə, artıq 2007-2009-cu illər üçün nəzərdə tutulan humanitar sferada proqram, poçt ötürmələri haqqında Hökümətlərarası saziş bütovlükdə işlənib hazırlanıb.
Hazırda 5-6 saziş də hazırlanmaqdadır. Onlar arasında kapital qoyuluşunun qarşılıqlı müdafiəsi, hərbi-texniki əməkdaşlıq, Qəbələ radiolokasiya stansiyasının (RLS "Daryal") nümayəndəlik hüququ haqqında sazişlər var. Humanitar proqram mədəniyyət, təhsil, gənclər və idman, tibb sahələrində tədbirləri nəzərdə tutur. Onun hazırlanmasına ehtiyac 2004-2006-cı illər üçün nəzərdə tutulan cari proqramın reallaşdırılması müddətinin sona yaxınlaşmasıdır.
Səfər bir sıra tədbirlərin həyata keçirməsini nəzərdə tutan Azərbaycanda Rusiya ilinin bağlanmasına həsr edilib.
İlin rəsmi bağlanması mərasimindən əlavə, hər iki dövlətin işgüzar dairələrinin iştirakı ilə biznes-forumun keçirilməsi gözlənilir. Nümayəndə heyətinin tərkibinə Rusiya sənaye və energetika nazirinin birinci müavini İvan Materov daxildir ki, bu da istilik-energetika kompleksi üzrə məsələlərin müzakirəsi mümkünlüyünü istisna etmir.
Nümayəndə heyətində Rusiyanın energetika şirkəti olan RSC "EES Rosii"-nin yüksək vəzifəli şəxslərinin də təmsil olunacağı istisna edilmir.
