Azərbaycan, Bakı /müx. Trend İ.Xəlilova, S.Əliyev / Azərbaycan Maliyyə Nazirliyi ölkənin Türkmənistana borcunun qaytarılması məqsədilə rəsmi Aşqabadla danışıqlara başlamağa hazırdır. Bunu Azərbaycanın maliyyə naziri Samir Şərifov deyib.
"Biz 1991-1992-ci illərdə yaranmış dövlət borcunu müzakirə etməyə hazırıq. Yalnız danışıqlar prosesində borcun həcmi müəyyən ediləcək" - deyə nazir bildirib.
Tərəflər bu vaxtadək borcun məbləği ilə bağlı anlaşa bilməyiblər. Halbuki danışıqlarda hökumət nümayəndə heyətinin tərkibi kifayət qədər yüksək olub. Baş nazirin müavininin rəhbərlik etdiyi heyətə Maliyyə Nazirliyi, Milli Bankı və "Azəriqaz" nümayəndələri daxil idi.
Türkmənistan tərəfi öz hesablamalarında təkid etməkdə davam edir. Qarşı tərəfin hesablamalarına əsasən, rəsmi Bakının iddia etdiyi rəqəm üç dəfə artıqdır. Belə ki, Azərbaycan rəsmiləri ölkənin Türkmənistana təbii qaza görə 18 mln. dollar borclu olduğunu deyir. Aşqabad isə faizləri əlavə edərək müvafiq rəqəmin 56 mln. dollara bərabər olduğunu iddia edir.
Türkmənistan 90-cı illərin əvvəllərində qazın əvəzinə Azərbaycandan göndərilən məhsulları nəzərə almır. Bu məhsullar hardasa yolda itib-batıb. Lakin Azərbaycan tərəfi bu itkilərə görə cavabdehlik daşımır. Həmçinin məsələyə aydınlıq gətirmək üçün hüquq-mühafizə orqanlarının nümayəndələri Aşqabada səfər ediblər. Azərbaycan Maliyyə Nazirliyi hesab edir ki, kompromis əldə olunacağı təqdirdə faizlərlə bağlı ödəmələrə dair məsələni də razılaşdırmaq mümkün olacaq.
Yeri gəlmişkən, Azərbaycan borc məsələlərinin həllində üçüncü tərəfin yardımından yararlanmağı düşünmür. Konkret olaraq Rusiyanın Milli Ehtiyat Bankı Azərbaycanın Türkmənistana olan borcunu almaq təşəbbüsü ilə çıxış edib.
"Biz borcu satmağa lüzum görmürük. Çünki ölkənin iqtisadi durumu kifayət qədər sabitdir. Belə bir mexanizmə iqtisadiyyat bərbad vəziyyətdə olduğu təqdirdə əl atmaq olardı. Belə olan halda borcu satmaq və 5-10 il sonra onun restrukturizasiyası haqda razılaşmaq olardı" - deyə maliyyəçilər vurğulayır.
