Azərbaycan, Bakı, 05 sentyabr / Trend , müxbir A.Bədəlova/ Xəzərin Azərbaycan sektorunda yerləşən "Yalama" (D-222 bloku) perspektivli dəniz strukturunda ikinci kəşfiyyat quyusunun qazma müddəti 2008-ci ilin noyabrından 2009-cu ilin əvvəlinə keçirilib.
Dünən layihədə 15 faizlik iştirak payı əldə etdiyi elan olunan "GDF Suez" enerji holdinqinin məlumatında bildirilir ki, "Yalama"da iştirak payının alınması şirkətin orta müddətli perspektivdə 670 mln. barel neft ekvivalentindən 1500 mln. barrelədək artırılması gözlənilən təsdiq və ehtimal olunan ehtiyatlarının artırılması strategiyasına müvafiqdir. Hazırda "GDF Suez"in fəaliyyəti Avropa və Afrikada cəmləşib.
Bu həftədən sahənin işlənməsində iştirak payının 65 faizi Rusiyanın "LUKOIL Overseas" şirkətinə, 20 faiz Azərbaycan Dövlət Neft Şirkətinə (ARDNŞ), 15 faiz isə "GDF Suez"ə məxsusdur.
LUKOIL ilə ARDNŞ arasında D-222 bloku üzrə PSA tipli müqavilə 1997-ci il iyulun 3-də imzalanıb. Kəşfiyyat dövrü 2011-ci ilin sonunda başa çatır.
D-222 bloku "Yalama" strukturunun bir hissəsidir və sahildən 30 km məsafədə, 80 metrdən 700 metr dərinliyinə qədər Xəzərin Azərbaycan və Rusiya sektorlarında bərabər hissələrlə yerləşir.
"GDF Suez"in vitse-prezidenti Jan-Fransua Sirellinin (Jean-Francois Cirelli) sözlərinə görə, şirkət tərəfindən layihədə iştirak payının əldə olunması Rusiyanın aparıcı özəl karbohidrogen istehsalçısı - LUKOIL və ARDNŞ ilə sənaye əməkdaşlığına başlamaq üçün ilk imkandır.
Məqalə müəllifi ilə əlaqə ünvanı - [email protected]
