Azərbaycan, Bakı, 07 oktyabr / Trend / SOCAR (Azərbaycan Dövlət Neft Şirkəti), əməliyyat şirkətləri (ƏŞ) və birgə müəssisələr (BM) cari ilin yanvar-sentyabr aylarında ölkənin offşor və anşor yataqlarından təqribən 47,8 mln. barel (təqribən 6,5 mln. ton) neft hasil ediblər ki, bu da 2007-ci ilin analoji dövr göstəricisindən təxminən 934,3 min barel azdır. Bu barədə SOCAR-dan məlumat verilib.
Bu il üçün olan proqnozlara əsasən, SOCAR, ƏŞ və BM 64 mln. barel (8,7 mln. ton) neft hasil edəcək. Bu həcmin 55 mln. bareli (7,4 mln. tonn) SOCAR-ın Neft-Qaz Çıxarma İdarələri (NQÇİ), 9 mln. bareli isə (1,3 mln. ton) ƏŞ və BM-in payına düşəcək.
Yanvar-sentyabr aylarında SOCAR, ƏŞ və BM-ın qaz hasilatı təqribən 5,8 mlrd. kubmetr təşkil edib ki, bu da 2007-ci ilin analoji dövr göstəricisindən 1,5 mlrd. kubmetr çoxdur.
Azərbaycan Beynəlxalq Əməliyyat Şirkəti (ABƏŞ) yanvar-sentyabr aylarında SOCAR üçün "Azəri-Çıraq-Günəşli" yatağından 1,2 mln. kubmetrdən çox səmt qazı hasil edib ki, bu da ötən ilin analoji dövr göstəricisindən 778 mln. kubmetr azdır.
Proqnozlara əsasən, 2008-ci ildə SOCAR-ın NQÇİ-i 7,850 mlrd. kubmetr, ƏŞ və BM isə 150 mln. kubmetr qaz hasil edəcək. Azərbaycan "Şahdəniz" yatağından 2,9 mlrd. kubmetr qaz əldə edəcək. ABƏŞ bu il Azərbaycana 1,4 mlrd. kubmetr qaz təhvil verəcək.
Azərbaycanda 57 neft-qaz yatağı var, onlardan 18 yataq dənizdə, qalanları isə quruda yerləşir. Bu gün SOCAR-ın əməkdaş ştatı təqribən 63 min nəfər təşkil edir.
2008-ci ildə Azərbaycanda neft və qaz hasilatının ümumi cədvəli:
| Sentyabr | Yanvar - sentyabr | |||
| İl | 2008 | 2008 | 2007 | % |
| Neft(min ton)Cəmi | 707,37 | 6484,18 | 6611,29 | 98,1 |
| Qaz(mln. m3) Cəmi | 643,80 | 5793,86 | 4264,89 | 135,8 |
