Azərbaycan, Bakı, 02 may / Trend , müxbir E.İsmayılov /
SOCAR (Azərbaycan Respublikası Dövlət Neft Şirkəti) cari ilin iyul ayında Xəzərin Azərbaycan sektorunda yerləşən perspektivli "Ümid" qazkondensat strukturunda ilk kəşfiyyat quyusu qazmağı planlaşdırır. Bu barədə şənbə günü SOCAR-da işlərə yaxın mənbə bildirib.
Bu strukturda kəşfiyyat qazmasının aparılmasında əsas məqsəd ölkədə qaz hasilatının artırılmasıdır.
"Quyunun qazılması yeddinci aya planlaşdırılıb və ilin sonunadək qazma işlərinin yarısı görüləcək", - deyə mənbə bildirib.
Mənbə bilidirb ki, ilk kəşfiyyat quyusunun dərinliyi 6500 metr təşkil edəcək, onun 4000 metrinin bu il qazılması planlaşdırılır.
Hazırda SOCAR "Ümid-1" platformasının tikintisi üzrə iş aparır və bu işlərin başa çatmasından sonra platformada kəşfiyyat quyularının qazılması nəzərdə tutulub. Platforma "Bulla-dəniz" dəniz yatağından 15 km. aralıda, suyun 58 metr dərinliyində yerləşdiriləcək. Platformadan altı qaz quyusunun qazılması nəzərdə tutulub.
SOCAR prezidenti Rövnəq Abdullayev perspektivli "Ümid" dəniz strukturunda çıxarılması ehtimal olunan ümumi qaz ehtiyatlarının 300 mlrd. kubmetr həcmində qiymətləndirildiyini bildirmişdi. "Ümid"də ehtimal olunan qazkondensat ehtiyatlar isə 30-40 mln. ton həcmindədir.
Məqalə müəllifi ilə əlaqə ünvanı: [email protected]
