Azərbaycan, Bakı, 28 oktyabr / Trend , müxbir K.Konırova, A.Bədəlova/
Qazaxıstan Energetika Nazirliyinin yuksək vəzifəli nümayəndəsi hesab edir ki, karbohidrogen ehtiyatlarının məhdudluğu ölkənin "Nabukko" layihəsində iştirakına əngəl törədir.
"Bu gün Qazaxıstan üçün əsas problem sərbəst resursların məhdudluğudur, belə ki, hazırda böyük qaz həcmi tələb edən mühüm layihələr həyata keçirilmə mərhələsindədir", - çərşənbə günü Qazaxıstanın ATƏT-də keçirilən sədrlik məsələlərinə dair beynəlxalq konfransda Meyram Kanapyanov deyib.
Dəyəri 7,9 mlrd. avro olan "Nabukko" qaz kəməri ilə Azərbaycan və Mərkəzi Asiyadan Aİ ölkələrinə qaz ixrac etmək nəzərdə tutulur. Qaz kəmərinin çəkilişi 2011-ci ilə təyin edilib. İlk tədarüklərə 2014-cü ildə start veriləcək. Boru kəmərinin maksimal gücü ildə 31 mlrd. kubmetrə bərabərdir. Qaz kəmirinin birinci mərhələsinin həyata keçirilməsi üçün əsas tədarükçü qismində Azərbaycan və İraq nəzərdə tutulub.
Türkiyə Prezidenti Abdulla Gül daha öncə bildirib ki, Qazaxstan "Nabukko" layihəsinin iştirakçısı olacaq. "Qazaxıstan "Nabukko" layihəsində maraqlı olduğunu bildirib. Qazaxıstan layihənin bir hissəsi olacaq. Qazaxıstanın təbii qazı Avropaya nəql olunacaq", - Gül deyib.
Türkiyə Avstriya, Macarıstan, Ruminya, Bolqarıstan və Almaniya ilə bərabər "Nabukko" layihəsinin iştirakçısıdır.
Kanapyanovun bildirdiyi kimi, Qazaxıstanın layihədə iştirakına mane olan ikinci məsələ Xəzər dənizinin dibi ilə qaz boru kəmərinin çəkilməsidir. Xəzərin tam statusu bu vaxta qədər müəyyən olunmayıb.
"Transxəzər qaz boru kəməri layihəsi həyata keçirilməyənə qədər Qazaxıstan "Nabukko" ilə qaz nəql edə bilməyəcək", - Kanapyanov deyib.
Direktor müavininin sözlərinə görə, gələcəkdə perspektiv qaz yataqlarının işləndiyi və Qazaxıstanın sərbəst qaz ehtiyatları olduğu halda ölkə "Nabukko" layihəsi üçün potensial qaz tədarükçüsü kimi nəzərdən keçirilə bilər.
"Nabukko"nun rəsmi numayəndəsi Kristian Dolezal Qazaxıstanın layihəyə qoşulmasının mümkünlüyünə dair şərh verərək deyib ki, Orta Asiya ölkələrinin Nabucco Gas Pipeline Int marketinq şirkətinin borularına qaz nəql etməyə hazır olmasını müsbət qiymətləndirir.
BP-nin məlumatına görə, 2009-cu ilin əvvəlində Qazaxıstanın təsdiqlənmiş qaz ehtiyyatı 1,82 trilyon kubmetr təşkil edir. BP-nin məlumatına əsasən, ölkədə qaz hasilatı 2008-ci ildə 30,2 milyard kubmetr olub ki, bu da 2007-ci ildəkindən 13,9 faiz çoxdur.
Məqalə müəllifi ilə əlaqə ünvanı: [email protected]
