Azərbaycan, Bakı, 28 aprel /Trend, müxbir N.İsmayılova/
Stravropol Diyarı öz ərazisində neft emalı zavodu (NEZ) tikmək təklifi ilə Azərbaycan investorlarına müraciət edib. Bu barədə Stavropol Diyarının qubernatoru Valeriy Qaevski çərşənbə günü deyib.
"Elə vaxtlar olub ki, biz yeddi milyon ton neft hasil edib emal etmişik. Hazırda bu göstərici cəmi bir milyon ton təşkil edir və bu, bizi qane etmir. Bu vaxta qədər bizdə neft emalı zavodu olmayıb. Belə ki, diyarın iqtisadiyyatı üçün neft istehlakı göstəricisi 2,5 milyon tondur. Əlbəttə ki, biz həm ARDNŞ-ə (Azərbaycan Respublikası Dövlət Neft Şirkəti), həm də iş adamlarına bizim diyarın ərazisində NEZ tikintisi üzrə təklifimizi nəzərdən keçirmələri üçün müraciət edirik", - Qaevski deyib.
Onun sözlərinə görə, Stavropol Diyarı zavodun gücünün ən azı 2 milyon ton həcmdə olmasını təklif edir, lakin son qərar investorlardan asılıdır.
ARDNŞ-nin yüksək vəzifəli nümyəndəsi daha əvvəl deyib ki, Stavropol Diyarı tərəfindən bu cür təklif artıq bildirilib. Rusiya tərəfi Stavropol Diyarında Azərbaycan nefti ilə işləyəcək neft emalı zavodu tikmək istəyir. Lakin bəzi hüquqi ziddiyyətlər var, belə ki, 1996-ci ildəki Rusiya-Azərbaycan dövlətlərarası müqaviləsinə əsasən, Azərbaycan nefti Rusiya ərazisinə tranzitlə (Bakı-Novorossiysk) ötürülür və Rusiya ərazisində heç bir tərəf bu neftdən istifadə hüququna malik deyil. Lakin əgər Rusiya tərəfi, yaxud Rusiya Federasiyasının hər hansı subyekti Azərbaycan neftini istifadə etmək istəyərsə, bu zaman bu istiqamətin digərləri ilə müqayisədə səmərəliliyini müəyyən etmək üçün hesablama aparılmalıdır.
2009-cu ildə Azərbaycan və Rusiya arasında əmtəə dövriyyəsi 1,816 milyard dollar təşkil edib ki, bu da MDB ölkələri ilə ümumi əmtəə dövriyyəsinin 60 faizdən çoxunu təşkil edir.
Ötən il Stavropol Diyarı ilə əmtəə dövriyyəsi 123,3 milyon dollar təşkil edib ki, bu da 2004-cü ildə qeydə alınan göstəricini iki dəfə ötür. 2009-cu ildə Azərbaycanın Stavropol Diyarı ilə əmtəə dövriyyəsi 30 faiz azalıb. 2008-ci ildə əmtəə dövriyyəsi 200 milyon dollar təşkil edib.
Hazırda Stavropol Diyarında 15 min azərbaycanlı yaşayır.