Azərbaycan, Bakı, 26 avqust /Trend, müxbir E.İsmayılov/
Qazaxıstan neftinin nəqli üzrə Transxəzər sisteminin yaradılması layihəsinin həyata keçirilməsi Xəzərin Qazaxıstan sektorundakı "Kaşaqan" layihəsinin işlənməsindən asılı olacaq. Bu barədə cümə axşamı ARDNŞ-dəki mənbə bildirib.
Transxəzər layihəsi Bakı-Tbilisi-Ceyhan neft kəməri üzrə Azərbaycan ərazisi vasitəsilə və Azərbaycan-Gürcüstan nəqliyyat marşrutu üzrə Aralıq dənizinə və Qara dənizə çıxışla neftin Qazaxıstandan nəql edilməsi üçün təsis edilir. İkinci dəhliz neftin dəmiryolla nəqlini, eləcə də Bakı-Qara dəniz yeni neft boru kəmərinin tikintisi imkanlarının nəzərdən keçirilməsini nəzərdə tutur.
Mənbənin dediyinə görə, əvvəllər layihə çərçivəsində işlərin 2013-2014-cü illərdə başa çatdırılması planlaşdırılmışdı. "Lakin hər şey "Kaşaqan" layihəsinin həyata keçirilməsindən və yükgöndərənlərdən asılı olacaq", - o qeyd edib.
İyunda Transxəzər sistemi ilə neft nəqli layihəsinin texniki-iqtisadi əsaslandırılmasının hazırlanmasına dair tender edilib. Mənbənin sözlərinə görə, tender hələ bağlanmayıb.
Lakin bundan əvvəl Qazaxıstanın "QazMunayQaz" Milli Şirkətinin prezidenti Kairgeldı Kabıldinin dediyinə görə, "Kaşaqan" yatağının mənimsənilməsinin ikinci fazası 2018-2019-cu illərə təxirə salınır. Transxəzər sistemi layihəsinin həyata keçirilməsi müddəti də avtomatik olaraq təxirə salınır.
O qeyd edib ki, sistemin yaradılması daha gec müddətə təxirə salınır, belə ki, "Kaşaqan"da birinci fazada hasil ediləcək neftin həcmi mövcud Xəzər Boru Kəməri Konsorsiumu, Qazaxıstan-Çin boru kəməri və dəmiryolla nəql olunacaq.
Transxəzər sisteminin ilkin daşınma imkanı ildə 23 milyon dollar təşkil edəcək. Bu layihə Azərbaycan və Qazaxıstanda tankerlər və terminallar, həmçinin birləşdirici boru kəmərlərinin inşasını nəzərdə tutur. Lakin mənbənin sözlərinə görə, birinci mərhələyə mövcud terminallar da cəlb edilə bilər.
