Azərbaycan, Bakı, 23 sentyabr /Trend, müxbir E.İsmayılov/
Azərbaycan Avropaya marşrut və qaz tədarükü mənbələrinin diversifikasiyalaşdırılmasına yönələn "Nabukko" qaz kəməri layihəsinin tikintisində tranzit ölkə kimi iştirak edə bilər. Bu barədə ARDNŞ-nin birinci vitse-prezidenti Xoşbəxt Yusifzadə Azərbaycanın hakim Yeni Azərbaycan Partiyasının rəsmi saytında yerləşdirilən müsahibəsində deyib.
Onun sözlərinə görə, bu onunla əlaqədardır ki, Azərbaycan qaz ixracatçısı ölkəsinə çevrilib. Ölkənin sübut edilən qaz ehtiyatları iki trilyon kubmetr təşkil edir, perspektiv ehtiyatlar baxımından isə onlar beş trilyon kubmetr qiymətləndirilir.
"Azəri-Çıraq-Günəşli" yataqlarının və "Şahdəniz" qaz-kondensat yatağının tammiqyaslı işlənməsi Xəzər dənizinin Azərbaycan sektorundakı yeni neft-qaz yataqlarının açılması baxımından qaz hasilatının xeyli artırılmasına proqnoz verməyə və 2015-ci ildə 30 milyard kubmetr həcmdə hasilat səviyyəsinə çıxmağa imkan verir", - Yusifzadə qeyd edib.
Azərbaycanın "Nabukko" layihəsində tranzit ölkə qismində iştirakına toxunan Yusifzadə qeyd edib ki, belə bir imkan var. Lakin bu, türkmən qazının Xəzər dənizi vasitəsilə Azərbaycana, daha sonra isə Avropaya nəqli ilə bağlıdır.
"Nabukko" layihəsinin tərəfdaşları bu istiqamətdə işləyirlər və danışıqlar aparırlar, lakin indi son nəticə haqqında danışmaq hələ ki tezdir", - Yusifzadə bildirib.
Dəyəri 7,9 mlrd. avro olan "Nabukko" qaz kəməri ilə Azərbaycan və Mərkəzi Asiyadan Aİ ölkələrinə qaz ixracı nəzərdə tutulur. Qaz kəmərinin çəkilişi 2011-ci ilə təyin edilib. İlk tədarüklərə 2015-ci ildə start veriləcək.
"Nabukko" qaz kəmərinin tikintisi iki əsas fazanın gedişində həyata keçiriləcək. Tikintinin birinci fazasına (2011-ci il) Türkiyə sərhədindən başlayaraq Avstriyanın Baumqarten şəhərində başa çatan 2 min kilometr uzunluğunda boru kəmərinin çəkilişi daxildir. İkinci fazaya (2014-2015-ci illər) boru kəmərinin Türkiyə və Gürcüstan, eləcə də Türkiyə ilə İraq arasında yerdə qalan hissəsinin tikintisi daxildir.
"Nabukko" qaz kəmərinin uzunluğu 2730 kilometr olan birinci hissəsinin tikintisinə Ankaranın (Türkiyə) cənub hissəsindən başlanacaq və qərb istiqamətində Mərkəzi Anadolu və Mərmərə dənizindən keçərək Bolqarıstan sərhədinədək uzanacaq. Bu marşrutun 75 faizi mövcud boru kəmərləri vasitəsilə çəkiləcək.
Layihə iştirakçıları Avstriyanın OMV, Macarıstanın MOL, Bolqarıstanın "Bulgargaz", Rumıniyanın "Transgaz", Türkiyənin "Botaş" və Almaniyanın RWE şirkətləridir. Onların hər biri bərabər paya - 16,67 faiz paya malikdir.
