Azərbaycan, Bakı, 14 dekabr /Trend,müxbir E.İsmayılov/
ARDNŞ (Azərbaycan Respublikası Dövlət Neft Şirkəti) Ukraynada şəxsi brendi altında bir neçə yanacaqdoldurma məntəqəsinin (YDM) açılışına hazırlaşır. Bu barədə Trend-ə ARDNŞ-nin yüksək vəzifəli nümayəndəsi bildirib.
Onun sözlərinə görə, hazırda ARDNŞ-nin brendi altında işləməyə başlayacaq bir neçə YDM-nin yenidən brendləşdirilməsi üzrə işlər aparılır.
"Hazırda yenidənbrendləşdirmə üzrə işlər aparılır, daha doğrusu, onların istismara verilməsinə hazırlıq görülür", - mənbədən bildiriblər.
Onun sözlərinə görə, hazırda Ukraynada ARDNŞ-in brendi altında artıq bir neçə YDM-lər işləyir.
Bundan əvvəl ARDNŞ-nin Ukraynadakı nümayəndəliyinin rəhbəri Elçin Məmmədovun dediyi kimi, şirkət 2011-ci ilin sonuna qədər Ukraynada şəxsi brendi altında otuz yanacaqdoldurma məntəqəsi açmağı planlaşdırır. YDM şəbəkələrinin yaradılması artıq mövcud olanların alınması və yaxud yeni stansiyaların inşası yolu ilə həyata keçirilir.
Bundan əvvəl ARDNŞ Ukraynada 20-yə yaxın yanacaqdoldurma məntəqəsi alıb. Bu layihə şirkətin xüsusilə Ukrayna bazarında neft məhsullarının genişmiqyaslı pərakəndə satışı üzrə fəaliyyət proqramının bir hissəsidir.
ARDNŞ-nin artıq Gürcüstanda 50-dən çox YDM şəbəkəsi var və Azərbaycanda məntəqələrin yaradılmasına başlanılıb. Həmçinin şirkət Rumıniyanın neft məhsullarının pərakəndə satışı bazarına çıxmaq niyyətindədir ki, bu da Aİ bazarına çıxış deməkdir.