Azərbaycan, Bakı, 3 aprel /Trend, müxbir E.İsmayılov/
ARDNŞ-nin (Azərbaycan Respublikası Dövlət Neft Şirkəti) "Azərikimya" İstehsalat Birliyi (İB) bu il Azərbaycan Beynəlxalq Bankından (ABB) 40 milyon dollaradək kredit cəlb etmək niyyətindədir. Trend-in məlumatına görə, bu barədə çərşənbə axşamı jurnalistlərə İB-nin rəhbəri Muxtar Babayev bildirib.
Görüş İB-nin ARDNŞ-nin tərkibinə daxil olmasının 2 illiyi münasibətilə təşkil edilib.
"Cəlb ediləcək vəsaitlər İB-nin tərkibinə daxil olan müəssisələrin inkişafı, yenidən qurulması və modernləşdirilməsinə ayrılacaq", - Babayev deyib.
"Azərikimya" artıq ABB-dən 40 milyon dollar həcmində kredit cəlb edib.
Babayevin sözlərinə görə, müəssisələrin inkişafı və modernləşdirilməsinə investisiya qoymaq prosesi təkcə cəlb edilən kreditlər hesabına deyil, həm də İB-nin öz vəsaitləri hesabına həyata keçirilir.
İB 2011-ci ildən etibarən qaz, su, buxar və elektrik enerjisinə qənaət proqramını reallaşdırır ki, bu da ötən il ərzində 1,8 milyon manat qənaət etməyə imkan verib.