Azərbaycan, Bakı, 21 noyabr /Trend, müxbirlər T.Cəfərov, E.Tariverdiyeva/
Yeni qaz anbarları İranın şimal əyalətlərində (Xəzəryanı ərazilərdə) tikilməlidir, çünki bu yerlərə qaz tədarükündə çətinliklər yaranır. Trend-in çərşənbə günü IRNA agentliyinə istinadən verdiyi məlumata görə, bu barədə İranın Qaz Saxlanması Şirkətinin baş direktoru Məsud Samivənd deyib.
Bu bəyanat Tehranda Əmir Kəbir Universitetinin ekspertlər qrupu ilə görüşdə səsləndirilib.
Samivəndin sözlərinə görə, etibarlı qaz təchizatı mənbəyini İranın şimal əyaləti Gülüstanda yaratmaq lazımdır və hazırda bu məsələ müzakirə edilir.
İranın Milli Qaz Şirkəti təqribən 14 milyard kubmetr qaz saxlamağın mümkün olduğu yeraltı qaz anbarları tikmək niyyətindədir.
