ARDNŞ respublika regionlarında müalicə-diaqnostika mərkəzlərinin inşası çərçivəsində 36,5 mln. AZN xərcləmək niyyətindədir. Trend in xəbər verdiyi kimi, bu barədə "Xalq qəzeti"nə "Azneft" İB-nin başçısının müavini Ağasəf Əliyev məlumat verib.
Hazırda Lənkəran rayonunda mərkəzin inşası başa çatıb. Yaxın vaxtlarda analoji mərkəzlər Əlibayramlı, Qazax, Gəncə, Bərdə, Zaqatala, Qəbələ və Qubada da inşa ediləcək. Bu obyektlər gələn il istismara veriləcək.
Şirkət nümayəndəsinin sözlərinə görə, "2006-2007-ci illərdə Bakı qəsəbələrinin sosial-iqtisadi inkişafının sürətləndirilməsinə dair tədbirlər proqramı" haqqında prezident fərmanı çərçivəsində ARDNŞ-ə bir sıra obyektlərin inşası və təmiri, o cümlədən avtomobil yollarının bərpası ilə bağlı tapşırıqlar verilib. Bu məqsədlə 5 mln. 498,3 min AZN ayrılıb.
ARDNŞ sosial sahədə də bir sıra layihələr gerçəkləşdirir. Bunlar arasında şirkət əməkdaşları üçün yeni evlərin, tibb mərkəzlərinin və s. tikintisi var. Bu məqsədlə 10 mln 295,7 min AZN məbləğində vəsaitin sərf edilməsi nəzərdə tutulur.
