Azərkimya dövlət şirkəti müəssisələrinin tərkibinə daxil olan EP-300 zavodu avadanlıq almaq üçün xarici şirkətlərlə danışıqlar aparır. Bu barədə Trend müəssisə direktorunun istehsalatın inkişafı və texniki təminatı üzrə müavini Samir Manafova istinadən xəbər verir.
Onun sözlərinə görə, danışıqlar Rusiya, Almaniya, Avstriya və Ukrayna şirkətləri ilə aparılır. Piroliz sobalarının 2008-ci ildə təmiri üçün nəzərdə tutulmuş bahalı spiral boruların alınması planlaşdırılır.
Bundan əlavə, bu yaxınlarda Ukraynadan daxil olan, zavodda ikinci kaskad kompressorlarının yeniləşməsi üzrə görüləcək işlər üçün nəzərdə tutulmuş avadanlıq alınıb.
Hazırda zavodda boru kompressorlarının işinin və E-4 sexində bütün texnoloji prosesin tam avtomatlaşdırılması üzrə işlər görülür. Bu məqsədlə artıq Amerikanın CCC şirkətindən lazımi avadanlıq alınıb və həmin şirkətlərlə onun montajı haqqında danışıqlar aparılır. Avstriyanın NALKO şirkətinin köməyi ilə isə soyuducu qurğunun növbəti yenidənqurulması nəzərdə tutulub.
