Azərbaycan, Bakı, 12 iyun /Trend, müxbir Q.Vəliyev/
Azərbaycanın Rabitə və İnformasiya Texnologiyaları Nazirliyinin "Aztelekom" İstehsalat Birliyi Kür çayında suyun səviyyəsinin qalxması nəticəsində yaranan təbii fəlakət zonasında bərpa işləri aparır. Bunu Trend-ə şənbə günü "Aztelekom"un mətbuat xidmətinin başçısı Vidadi İsmayılov deyib.
İsmayılovun sözlərinə görə, "Aztelekom"un mütəxəssislər briqadası mümkün olan yerlərdə profilaktik işlər aparır.
"Təbii fəlakət nəticəsində yaranmış problemlər hələ ki axıra qədər aradan qaldırılmayıb. Çünki bəzi regionlarda suyun səviyyəsinin yüksək olması şəbəkə infrastrukturuna çıxışa mane olur. Hal-hazırda problemin həllinin bir sıra alternativ variantları nəzərdən keçirilir. Bununla paralel olaraq təbii fəlakətin "Aztelekom"un telekommunikasiya infrastrukturuna vurduğu ziyan hesablanır.
Bundan qabaq verilən məlumata görə, operatora məxsus, Şirvan şəhərində Bakı istiqamətində yerləşən 15 km-ə yaxın magistral teloptik xətti su altındadır. Amma buna baxmayaraq, rabitədə problemlər yoxdur.
Təbii fəlakət zonasına problemlərin aradan qaldırılması üçün "Aztelekom"un 3 briqadası göndərilib. Onlar zəif nöqtələri tapır və onların aradan qaldırılması üçün zəruri tədbirlər görür. Analoji vəziyyət, həmçinin, Sabirabad rayonunda və ona yaxın yaşayış məntəqələrində müşahidə olunur.
Fəlakət nəticəsində CDMA simsiz rabitənin baza stansiyalarına ziyan dəyməyib.
