Azərbaycan, Bakı, 29 mart /Trend, müxbir H.Vəliyev/
Azərbaycan Milli Elmlər Akademiyasının (AMEA) İnformasiya Texnologiyaları İnstitutu "Eduroam" (education roaming) servisini qurmağa imkan verən platforma yaradır. Bu barədə Trend-ə çərşənbə axşamı institutdan məlumat veriblər.
"Eduroam" servisi elmi müəssisə və təhsil sisteminin əməkdaşlarına ezamiyyətdə olan zaman internetdən pulsuz istifadə imkanı verir. İstifadəçi "Eduroam"un fəaliyyət zonasında olarkən öz uçot məlumatlarından (ad və parol) istifadə etməklə internet şəbəkəsinə qoşula bilər.
"Təhsil rouminqi" servisi ilin sonunadək AzScienceNet elmi kompüter şəbəkəsinin bazasında yaradılacaq.
"Eduroam" servisinin təşkili üçün infrastrukturu yaratmaq, lazımi parametrlərin loginini təmin etmək və istifadəçinin texniki dəstək xidmətini yaratmaq lazım olacaq.
"Eduroam" servisi Trans-Avropa Tədqiqat və Təhsil Şəbəkəsi Assosiasiyasının (TERENA) işçi qrupu tərəfindən yaradılıb. O, şəbəkə infrastrukturunu birləşdirmək imkanı yaratmaqla, bütün elm və təhsil şəbəkələri arasında vahid əlaqəni təmin edir.
Hazırda "Eduroam" servisi Avropanın 35-dən çox elmi-tədqiqat və təhsil müəssisələrində yaradılıb. Onların isə öz növbəsində yüzlərlə təhsil müəssisələri var.
Hər bir müəssisənin şəbəkədə istifadəçilərin avtorizasiyasını təmin edən şəxsi serverləri var. Server institutlar arasında sorğuların göndərilməsini təmin edəcək və Mərkəzi Avropa serverinə qoşulacaq.