Azərbaycan, Bakı, 17 may /Trend, müxbir H.Vəliyev/
Azərbaycanın Rabitə və İnformasiya Texnologiyaları Nazirliyi internet-provayderlərlə son istifadəçilərin qarşılıqlı münasibətlərini tənzimləyən qayda hazırlayıb. Bu barədə çərşənbə axşamı Trend-ə Azərbaycan Rabitə və İnformasiya Texnologiyaları Nazirliyinin İnformasiya cəmiyyətinin inkişafı şöbəsinin müdiri İsfəndiyar Əliyev bildirib.
Əliyevin sözlərinə görə, bu sənədin hazırlanmasında əsas məqsəd internet istifadəçilərinin hüquqlarının məhdudlaşdırılması ilə bağlı halların çoxalmasıdır. Sənəd Azərbaycanın Ədliyyə Nazirliyində qeydiyyatdan keçəndən sonra qüvvəyə minəcək.
"Sənəd istifadəçilərlə provayderlər arasında qarşılıqlı əlaqələrin harmoniyası və şəffaflığının təmin edilməsini nəzərdə tutur. O, həmçinin, onlar arasındakı bütün məsələlərin hüquqi müstəviyə keçirilməsini təmin edir. İstifadəçi xidmət tədarükçüsündən hansı çıxış sürətini əldə etdiyini qiymətləndirmək üçün tam hüquqa malikdir", - Əliyev bildirib.
Bir müddət əvvəl rabitə və informasiya texnologiyaları naziri Əli Abbasovun dediyi kimi, nazirlik internet-provayderlərin fəaliyyətinin lisenziyalaşdırılması prosedurunu hazırlamağı planlaşdırır ki, bu da həm internet istifadəçilərinin hüquqlarının məhdudlaşdırılması, həm də virtual şəbəkədə təhlükəsizlik təhdidlərinin hələ də artması ilə əlaqədardır. Nazir hesab edir ki, internet-provayderlərə münasibətdə lisenziyalaşdırmanın tətbiqi onların fəaliyyətinin əsas tənzimləyicisi olacaq.
Azərbaycan İnternet Cəmiyyətinin sədri Qalib Qurbanovun fikrincə, internet-servis provayderlərinin fəaliyyətinin lisenziyalaşdırılması onlar tərəfindən göstərilən xidmətin keyfiyyətini artırmağa imkan verəcək.
Onun sözlərinə görə, ISP fəliyyətinin reqlamentinin olmaması lazımi səviyyədə xidmət göstərməyən çoxlu sayda provayderlərin yaranmasına gətirib çıxarıb.
"Hazırda istənilən şəxs minimal avadanlıq almaqla internet xidməti göstərə bilər. Bazarın bu seqmentində nəzarətin olmaması bazarda təsadüfi və hazırlıqsız provayderlərin fəaliyyətinə səbəb olub. Onların nə texniki bazası, nə təhlükəsizlik avadanlığı, nə də mütəxəssisləri var. Onların göstərdikləri xidmətin keyfiyyəti isə daha yaxşı ola bilərdi. Son nəticədə aldadılan istifadəçilər olur", - Qurbanov qeyd edib.
Qurbanovun sözlərinə görə, provayderlərin fəaliyyətinin lisenziyalaşdırılması yenilik deyil və dünyanın bir çox ölkələrində tətbiq olunur. Və dünya birliyinin üzvü olan Azərbaycan bu təcrübədən istifadə etmək fikrindədir.
