Azərbaycan, Bakı, 16 fevral / Trend, müxbir H.Vəliyev /
Azərbaycanın Rabitə və İnformasiya Texnologiyaları Nazirliyinin "Teleradio" İstehsalat Birliyi (İB) regionlarda DVB-T rəqəmsal televiziyanın əhatə dairəsinin genişləndirilməsi üçün avadanlıqlar alır. Bunu "Teleradio" İstehsalat Birliyinin baş direktoru Əflatun Şərifov Trend-ə bildirib.
Şərifovun sözlərinə görə, İB tərəfindən sifariş olunmuş 10 yeni DVB-T ötürücüsündən ikisi artıq ölkədədir, digərləri isə hazırlanma mərhələsindədir.
Cihazlar istehsal mərhələsi başa çatdıqdan sonra müxtəlif hava şəraitinə, titrəyişədavamlılığa görə yoxlanışdan keçəcək.
"Ötürücülərin quraşdırılması Gəncədə yaşayış yerlərindən kənarda, dəniz səviyyəsindən 2000 metr yüksəklikdə nəzərdə tutulub. Əlverişsiz hava şəraitinə görə hazırda antenaların quraşdırılması qeyri-mümkündür. Buna görə də biz havanın yaxşılaşmasını gözləyirik", - Şərifov deyib.
İnstalyasiya avadanlığının quraşdırılmasının həyata keçirilməsində əsas vəzifə dislokasiya üçün ən optimal yerin seçilməsidir. "Teleradio" İB rəhbərinin sözlərinə görə, cihazların qurulması kompleks yanaşma tələb edir. İnstalyasiya işləri çərçivəsində antenanın və ötürücünün quraşdırılması, ötürücüdən antennaya qədər fiderin çəkilməsi, sistemin işlək vəziyyətə gətirilməsi, yoxlanışdan keçirilməsi və elektromaqnit təsir sahəsinin ölçülməsi nəzərdə tutulur.