...

Azad İstehlakçılar Birliyi mobil operatorların əhatə dairəsi və xidmət keyfiyyətlərini araşdıracaq

Telekommunikasiya Materials 6 Fevral 2006 19:48 (UTC +04:00)

"Azad İstehlakçılar Birliyi" Azərbaycanda kommunikasiya məsələlərini araşdıran xüsusi komissiya yaradıb. Trend in məlumatına görə, bu barədə fevralın 6-da keçirilən mətbuat konfransında Azad İstehlakçılar Birliyinin (AİB) sədri Eyyub Hüseynov məlumat verib. O, bildirib ki, bu komissiyanın üzvləri respublikanın müxtəlif regionlarına ezam olunacaqlar, yerlərdə monitorinq apararaq hansı mobil operatorun əhalini daha çox aldatdığını müəyyən edəcəklər. "Azercell", "Bakcell" və "Catel" operatorlarının əhatə dairəsi və göstərdiyi xidmətin keyfiyyətini araşdıraraq ictimaiyyətə və ictehlakçılara məlumat veriləcək.

Qeyd edək ki, AİB Rabitə və İnformasiya Texnologiyaları naziri Əli Abbasova, "Bakcell LTD" MMC-nin baş direktoru Xaym Maymuna, "Azercell" BM-nin baş direktoru Sərdar Canoğlullarına rəsim məktubla müraciət edib. Müraciətdə xahiş olunub ki, hər bir operator öz əhatə dairəsi (coğrafiyası), qiymət siyasətinə dair materialları və 2005-ci ildə quraşdırılan antenalarının sayı barədə məlumat versinlər. İlk cavabı Rabitə və İnformasiya Texnologiyaları Nazirliyi verib, bildirilib ki, "Azercell" operatoru Azərbaycan əhalisinin 98 faizini, ərazisinin isə 95 faizini əhatə edir. "Bakcell" isə əhalinin 80 faizini əhatə edir. "Catel"in əhatə dairəsi isə Bakı, Abşeron yarımadası, Sumqayıt, Gəncə şəhərləri, Xaçmaz və Nabran rayonları olduğun bildirilib. Nazirlikdən sonra AİB-ə "Azercell"dən cavab daxil olub, "Bakcell"dən isə indiyədək heç bir cavab verilməyib.

AİB-in araşdırmalarına görə "Bakcell" öz əhatə dairəsində bir neçə kiçik inzibati əraziləri böyük yaşayış məntəqələri kimi təqdim edir. Həmçinin hazırda işğal altında olan əraziləri də əhatə etməsi barədə məlumatlarından belə qənaətə gəlinir ki, "Bakcell" erməni işğalçıları üçün də mobil rabitə yaradır. AİB-in müvafiq komissiyası bu məsələlərin araşdırmasını davam etdirəcək.

Xəbər lenti

Xəbər lenti