Azərbaycanın rabitə və informasiya texnologiyaları naziri Əli Abbasov ABŞ-ın Ticarət və İnkişaf Agentliyi (USTDA- United States Trade and Development Agency) və Strategic Policy Research, İnc. (SPR) şirkəti arasında qrant sazişi çərçivəsində şirkətin missiyası ilə görüşüb. Bu barədə Trend nazirliyə istinadən xəbər verir. Maliyyə və strateji məsələlər üzrə ekspertlər missiyasına şirkətin hüquqşünaslıq üzrə mütəxəssisi Kreyq Bleykli (Craig Blakeley) başçılıq edib.
Görüşdə Ə.Abbasov qeyd edib ki, şirkətin ekspertlərinin nazirlikdə strateji və təşkilati islahatların keçirilməsi istiqamətində ilk təkliflərini yüksək qiymətləndirir.
Saziş çərçivəsində gələcək fəaliyyət, əsas vəzifələr və s. müzakirə olunub. Ekspertlər, öz növbəsində, vurğulayıblar ki, onlar Azərbaycanın rabitə və informasiya texnologiyaları sahəsində keçirilmiş islahatları yüksək qiymətləndirirlər və bildiriblər ki, son təklifləri hazırlayarkən bu istiqamətdə dünya təcrübəsi və ölkənin iqtisadi inkişaf perspektivləri nəzərə alınacaq.
SPR islahatlar və institusional dəyişiklər, o cümlədən tənzimləyici qurumun yaradılması üzrə aparılmış tədqiqatlar əsasında Rabitə Nazirliyi üçün tövsiyyələr hazırlamalı olacaq.
Qrant sazişi 2005-ci ilin yanvar ayında AR rabitə və informasiya texnologiyaları naziri Əli Abbasov və ABŞ-ın Bakıdakı səfirliyinin işlər müvəkkili Ceyson Haylend tərəfindən imzalanıb. Qrantın həcmi təxminən 735 min ABŞ dollarıdır.
